Kur jemi 1 natë para zgjedhjeve, Kreu i PD-së, Lulzim Basha, i bën thirrje qytetarëve që të distancohen nga dhuna, pasi siç shprehet ai ditën e nesërme nuk ka zgjedhje.
Në një komunikim për qytetarët, Basha thekson se nesër do të shkelet ligji pasi zgjedhjet janë anti-kushtetuese. Ai i drejtohet mbështetësve të tij të largohen nga dhuna pasi kjo është ajo cfarë kryeministri Rama do, teksa thekson se kryeministri nuk do rrëzohet me dhunë por me drejtësi.
Pjesë nga deklarata e Bashës:
“Nesër në Shqipëri nuk ka zgjedhje, zgjedhjet janë mekanizmi si të vendosin, por nesër nuk ka zgjedhje. Zgjedhjet janë shprehje e vullnetit të lirë të njerëzve, por nesër nuk ka liri. Nesër do të shkelet ligji. Unë e di që shumë nga ju kanë dashur e pritur që nesër të mos kishte votime fars, por e vetmja mënyrë për ta arritur këtë do të ishte mënyra e dhunshme, që do të shkaktonte vëllavrasje e humbje njerëzore. Dhuna nuk do të prodhonte as përfitime politike, por thjesht do të sillte një ndjenjë të rreme të triumefit të çastit. Unë dhe demokratët nuk besojmë te dhuna, ndaj dhe sot dua t’iu them të gjithëve, jini krenarë, sepse i keni bërë një shërbim të madh Shqipërisë, duke mos rënë pre e dhunës të orkestruar nga Rama. Ky regjim është plagosur për vdekje dhe do rrëzohet shumë shpejt. Rama nuk kupton asnjë gjuhë tjetër, vec dhunës. Unë nuk besoj se dhuna është zgjdhje, unë besoj se forca jonë qëndron te këmbëngulja e drejtësia e asaj që kërkojmë, te bashkimi, durimi e kurajoja. Asnjë pushtet politik që del nga dhuna nuk ka sjellë kurrë asgjë të mirë për popullin. Nga dhuna nesër nuk përfiton askush përvec Edi Ramës. Dhuna dhe viktimat i vlejnë vetëm Ramës. Rrëzimi i Ramës nuk do të vijë duke përplasur shqiptarët, duke goditur e rrahur njëri-tjetrin”.
