Këshilli Kombëtar i Partisë Demokratike u mblodh ditën e sotme për të diskutuar mbi situatën politike dhe aksionin opozitar, pas dekretit të presidentit Meta për anulimin e zgjedhjeve vendore të 30 qershorit.
Kreu i PD-së, Lulzim Basha raportohet të ketë se tashmë është e qartë se nuk do të ketë zgjedhje pa opozitën, ndërsa shtoi se me siguri se do të ketë zgjedhje të parakohshme parlamentare.
“Është e sigurt që do të ketë zgjedhje të parakohshme. Është e sigurt, është beteja jonë. Detyra jonë është që ta bëjmë bashkë me shqiptarët. Ne ia dolëm që të ndalojmë procesin fals dhe kriminal të 30 qershorit. Tashmë është e qartë që nuk do ketë zgjedhje lokale pa opozitën. Zgjedhjet pa dekret presidenti nuk janë zgjedhje dhe se zgjedhjet pa opozitën nuk janë zgjedhje“, deklaroi ai.
Ndër të tjera, lideri i opozitës u kërkoi anëtarëve të forumit më të lartë politik vendimmarrës të Partisë Demokratike që gjatë gjithë kësaj kohe të rrisin angazhimin publik qytetar në nivelin më maksimal. Ai shtoi gjithashtu se synimi i opozitës së bashkuar është largimi i kryeministrit Rama nga pushteti.
