Ministri i Jashtëm në Detyrë, Gent Cakaj ka reaguar në lidhje me rekomandimin e Komisionit Europian për hapjen e negociatave me BE-në, teksa e ka konsideruar një raport që dëshmon progresin e vendit.
“Komisioni nënvizon se Shqipëria është një rast suksesi sa i përket reformës në drejtësi. E veçon për një shkak me vlerë të dyfishtë, nivelin e performancës ndërkombëtar. Duke vlerësuar numrin e gjyqtarëve dhe prokurorëve të vetuar thekson se është kryer nën monitorimin e ONM. Qeveria është vlerësuar për luftën ndaj korrupsionit dhe trafikut e drogës”, deklaroi Cakaj.
Po ashtu, Cakaj tha se tani është koha që palët politike të lënë mënjanë interesat personale.
“Interesat e vendit duhet të kalojë çdo interes politik e personal. Në vend të retorikave shterpe ka ardhur koha e dialogut”, shtoi ai.
I pyetur më tej nëse do të ndikojë kriza politike në vend për përgjigjen përfundimtare në qershor ai u shpreh se qeveria do të vazhdojë punën e saj.
“Lidhur me krizën politike, vetë komisioni konstaton se Parlamenti i Shqipërisë është funksional. Ky raport ka edhe një mesazh për opozitën dhe kushdo që ka vullnet mund ta kuptojë. Opozita duhet të ripërfshihet në institucionet politike. KE thotë se duhet të kalohet polarizimi politik. Nëse shtetet anëtare do ta përdorin si alibi sjelljen e opozitës, është një çështje tjetër, por kjo nuk na dekurajon neve. Ky raport nuk është vetëm përgjigje për kritikat e opozitës ndaj qeverisë, por edhe vetë përmbajtja e raportit e bën opozitën përgjegjëse për sjelljen e saj”, u shpreh ministri në detyrë.
