Deputetja e grupit parlamentar të Partisë Demokratike, Rudina Hajdari e konsideron “fatalitet politik” marrëveshjen mes partive të opozitës për të mos marrë pjesë në zgjedhjet vendore të 30 qershorit.
Përmes një statusi në “Twitter”, Hajdari shkruan se qeveria dhe partitë opozitare nuk duhet të qëndrojnë indiferentë ndaj kësaj gjendje, por të ulen në një tryezë bisedimi.
“Marrëveshja ndërmjet partive politike të opozitës për mospjesëmarrje në zgjedhjet lokale, e shikoj si një fatalitet politik.
Nga ana tjetër, indiferencën e qeverisë për situatën e krijuar dhe uria absolute e saj për të gllabëruar çdo ditë pushtet, nuk përbën gjë tjetër, veçse shkakun e drejtë për drejtë të kësaj gjëndjeje.
Sa nuk është vonë të gjithë ata që duan të ardhmen e Shqipërisë, nuk duhet të qëndrojnë indiferentë, por të ulen në tryezën e bisedimit për të gjetur zgjidhjen e shumë pritur”, shkruan Rudina Hajdari.
