Pas largimit të bujshëm të Argjira Spancës nga “She’s On Top”, një epokë e re po nis për formatin e njohur televiziv.
Prej muajsh, emri i pasueses së saj ka qenë në qendër të spekulimeve, por tashmë duket se misteri është zgjidhur. Burime pranë produksionit bëjnë të ditur se drejtimi i edicionit të shtatë i është besuar Sara Gjordenit.
Ish-finalistja e “Big Brother VIP” rikthehet kështu në një rol kyç në ekran, këtë herë si moderatore kryesore, duke firmosur kontratën së bashku me producentin Edi Manushi. Për Sarën, kjo nuk është një eksperiencë e panjohur, pasi ajo ka qenë më herët pjesë e spektaklit në rolin e anëtares së jurisë.
Ky angazhim shënon një hap të rëndësishëm në karrierën e saj televizive, duke e rikthyer në vëmendjen e publikut në një pozicion edhe më të fuqishëm.
Paralelisht me këtë zhvillim profesional, Sara po përjeton edhe një periudhë të rëndësishme në jetën personale si nënë e re, ndërsa vijon të zgjerojë horizontet e saj në biznes, me lançimin e një linje kozmetike dhe parfumesh.
