Dalin detaje të reja lidhur me grabitjen e ndodhur rreth orës 15:30 në Rinas, ku po transportoheshin paratë e një banke të nivelit të dytë.
Autorët kanë qenë të kamufluar, teksa kishin veshur rroba ushtarake dhe kanë lëvizur me një furgon të bardhë, pa targa, ku shkruhej “hetimi tatimor”, si dhe kanë qenë të armatosur.
Mësohet se gjatë grabitjes, ka pasur edhe të shtëna armësh, ndërsa dyshohet se një person ka mbetur i vdekur, gjë që ende nuk është konfirmuar nga policia.
Aktualisht në vendngjarje kanë mbërritur dy prokurorë të Krimeve të Rënda, Kreshnk Ajazi dhe Ndini Tavani.
Shifra e grabitur dyshohet të jetë rreth dy milionë euro, ndërsa Policia ka ngritur postblloqe të shumtë pas ngjarjes, si dhe ka bllokuar aksin rrugor Rinas-Valias. Dyshohet se autorët janë larguar në drejtim të Fushë-Krujës.
