Analisti Fatos Lubonja, në një lidhje skype nga Italia për ‘New24’ foli për opozitën e re në parlament. Ai u shpreh se këta deputetë të rinj përdoren si instrumente, por kur ke blerë një deputet ke blerë një popull që ai përfaqëson.
Sipas tij, deputeti e shikon atë që i ka dhënë votën si mjet për të gjeneruar para, kësisoj dhe protestat i sheh të domosdoshme.
“Kur blen një deputet, ke blerë një popull që ai përfaqëson. E ke parë si instrument për qëllimet e tua dhe një popull që ai përfaqëson. Ai deputeti shikon atë që i ka dhënë votën si mjet për të bërë para. Është thelbi i gjësë që duhet të ndryshojë kulturalisht. Konica thotë se është dheu që prodhon ato pemë, dmth ata njerëz. Me këtë instrumentalizim që ka bërë kryeministri, protestat janë shumë pak”, tha Lubonja.
Sa i përket përfshirjes së tij të mundshme në politikë, Lubonja u shpreh se është e pamunduar të bëhen dy gjëra, politikanin dhe intelektualin, megjithatë, sipas tij, secili duhet të bëjë mirë punën e tij.
“Nuk është kollaj të bësh dhe politikanin dhe intelektualin. Politikani kërkon votën, ndërsa intelektuali duhet të kërkojë të vërtetën. politikani për të marrë votat i duhet të bëjë koalicion dhe me gjëra që nuk ndan vizionin. janë dy punë të ndryshme që nuk mund t’i bëjë dot një njeri. Aq më tepër kur zhgënjehesh nga ky lloj politikani. Megjithatë secili duhet të bëjë mirë punën e tij them unë”, deklaroi Lubonja.
