Drejtoresha e Klinikës Infektive në Prishtinë, Lendita Ajvazi-Berisha bën me dije se po trajtojnë 8 persona, të cilët dyshohen të jenë prekur nga koronavirusi.
Ajo u shpreh se këta persona kanë ardhur nga rajone të ndryshme, teksa thekson se janë në pritje të rezultateve të analizave të tyre.
“Po, janë tetë raste të reja të dyshuar me koronavirus që janë pranuar sot në Klinikën Infektive. Ata kanë ardhur në Kosovë nga regjione të ndryshme. Jemi në pritje të rezultateve nga Instituti Kombëtar i Shëndetit Publik”, tha ajo për KosovaPress.
Tashmë pritet publikimi i përgjigjes së testeve nga Instituti Kombëtar i Shëndetit Publik. Kujtojmë se Kosova është një nga vendet e pakta në Evropë që akoma nuk ka shënuar asnjë rast me koronavirus.
