Presidenti i Serbisë, Aleksandar Vuçiç, kryeministri i Shqipërisë, Edi Rama dhe homologu i tyre i Maqedonisë së Veriut, Zoran Zaev takohen sot në Novi Sad të Serbisë.
Agjenda e bisedimeve nuk është specifikuar por pritet që temë kryesore të jetë ideja për eliminimin e barrierave tregtare, raporton Shërbimi i Ballkanit i Radios Evropa e Lirë.
Takimi vjen pas një deklarate të mëhershme të Vuçiçit, i cili ka propozuar një qasje të përbashkët të këtyre vendeve, ngjashëm me Grupin e Vishegradit, i cili përbëhet nga Hungaria, Polonia, Çekia dhe Sllovakia.
Në atë rast Vuçiç ka thënë se të vepruarit si bllok do t’iu jepte vendeve të Ballkanit reputacion më të mirë në Evropë.
Zyrtarët serbë ndërkohë kanë theksuar se thelbi i bllokut do të qëndronte në krijimin e një tregu të përbashkët dhe një destinacioni të vetëm investimesh.
Autoritetet në Maqedoninë e Veriut kanë thënë se çdo hap do të diskutohet me partnerët e tyre evropianë dhe amerikanë.
Në Shqipëri nuk ka ende deklarata zyrtare në lidhje me këtë ide.
