Kreu i PD-së Lulzim Basha, ish-kryeministri Sali Berisha dhe drejtues të PD-së, zhvilluan mesditën e sotme homazhe në monumentin e heroit të demokracisë Azem Hajdari, në Qytetin Studenti në Tiranë.
Këto homazhe u mbajtën në kujtim të 8 Dhjetorit, Lëvizjes Studentore që solli rënien e diktaturës komuniste në Shqipëri. Basha dhe Berisha vendosen kurora me lule në nderim të liderit të lëvizjes studentore të vitit 1990.
Homazhet u zhvilluan pa praninë e deputetes Rudina Hajdari, vajzës së Azemit, e cila është ndarë përfundimisht nga PD-ja, duke iu bashkuar një partie të sapokrijuar. Në ceremoni nuk ishin të pranishëm as pjesëtarë të tjerë nga familja Hajdari.
Sot shënohen 30 vjet nga ngjarjet e dhjetorit 1990. Natën e 8 dhjetorit 1990, rreth 300 studentë nisën atë që më vonë u quajt Lëvizja Studentore ‘90. Të organizuar, ata marshuan nga ‘Qyteti Studenti’ drejt qendrës së Tiranës.
