Aksidenti/Vajzat ishin kunata, zbardhet vendimi i prindërve të viktimës

Sot pritet të jepet masa e sigurisë për Denisa Dokun, të renë e cila drejtonte automjetin tip “Smart” kur ndodhi aksidenti tragjik, e ndërroi jetë Alida Spahiu, 22-vjeçe. Aksidenti tragjik ndodhi mbrëmjen e së shtunës në Kamëz, ku 19-vjeçarja Denisa Doku, shoferja e ‘Smartit’ i preu rrugën ‘Benzit’ dhe shkaktori përplasjen fatale.

Nga përplasja e fortë, Alida nuk mundi të jetonte. Prindërit e viktimës kanë zbuluar se Alida Spahiu ishte e fejuara e vëllait të Denisa Dokut.

Prindërit e viktimës kanë kërkuar në gjykatë, për shkak të lidhjeve familjare, që 19-vjeçarja të mos ndiqet penalisht. “Marrëdhëniet tona me familjen Doku janë të sqaruara. Kemi marrëdhënie familjare, pasi Alida ishte e fejuara e vëllait të Denisës”, thonë familjarët.

Mësohet se avokati Bardh Koçi ka kërkuar një masë të lehtë sigurie, pasi 19-vjeçarja duhet t’i jepet mundësia që të vazhdojë shkollën. “Duhet te ndalohej edhe drejtuesi i “Benzit” deri sa te dalë ekspertiza. Aksidenti ka ndodhur në momentin që ‘Smarti’ do të merrte kthesën. Drejtuesja e mjetit nuk ka qenë e alkoolizuar, dhe nuk ka qenë me shpejtësi”, ka thënë avokati.