Përplasje mes forcave të policisë dhe protestuesve ka pasur jo vetëm me banorët e Unazës së Re. Forcat e policisë janë përplasur edhe me disa gra protestuese, të cilat i janë afruar perimetrit të sigurisë.
Menjëherë ka pasur një ndërhyrje të shpejtë nga efektivët, duke i larguar ato me forcë, për të mos lejuar kalimin nga pedonalja.
“Mos më prek”, thërrisnin zonjat në tentativë për të bërë rezistencë, por ato janë larguar me forcë.
Sipas të dhënave, policia ka larguar protestueset dhe ka marrë masa të shumta për shkak se një delegacion holandez do të mbërrinte në Ministrinë e Brendshme.
Sapo ka mbërritur në institucionin e ministrisë ky delegacion, mes të cilëve ndodhet edhe ministri i Drejtësisë i Holandës.
“Kemi marrë leje për të protestuar, por nuk po na lejojnë. Ne do protestojmë kudo. Policia ka urdhëruar dhunë ndaj grave dhe femrave, është e tmerrshme”, tha ish-deputetja Albana Vokshi.
Po ashtu, edhe gazetari i News 24 Erjon Skëndo ka pasur një përplasje me policët, të cilët e kanë larguar atë me forcë./ Tirana Today
