Zv.ndihmës Sekretari Amerikan i Shtetit, Matthew Palmer, ka përsëritur qëndrimin e Uashingtonit sa i përket zhvillimeve politike në Shqipëri. Në një takim me gazetarët, ai vendosi pikat mbi ‘i’, duke thënë se opozita ka përgjegjësi të marrë pjesë në zgjedhjet e qershorit 2019.
Zyrtari i lartë i DASH u shpreh se nuk është në Tiranë për të negociuar krizën politike, por nënvizoi se djegia e mandateve nuk është zgjidhje.
“Nuk është zgjidhje djegia e mandateve nga opozita, duhet të gjej një mënyrë për të marr pjesë në zgjedhje. Do të ishte fatkeqësi nëse opozita nuk do të merrte pjesë në këtë proces demokratik. Përgjegjësi e opozitës është të marrë pjesë në zgjedhjet e qershorit, dhe të ndaj vizionin e saj me mbështetësit dhe të punoj fort për t’i fituar zgjedhjet”, tha ai.
Zëvendës Ndihmës Sekretari i Shtetit për Evropën, Matthew Palmer ndodhet në Tiranë prej ditës së djeshme, ku u takua me kryeministrin Edi Rama, ndërsa sot do të vijojë takimet me Presidentin Ilir Meta dhe drejtues të opozitës.
