Drejtori i Përgjithshëm për Zgjerim në Bashkimin Europian, Christian Danielsson, u shpreh kundër bojkotit të Parlamentit nga opozita. Pas takimit me kryeministrin Edi Rama dhe liderin e opozitës Lulzim Basha, Danielsson tha në një konferencë për mediat se bojkoti i Parlamentit nuk është në qasjen e vendeve demokratike.
“Parlamenti është thelbësor, duhet që të luajë rolin e vetë përgjegjës. Si rezultat, bojkoti i Parlamentit është diçka që nuk është në përputhje me këtë qasje. Dhe kjo nuk çon në dialogun kaq shumë të domosdoshëm në demokraci”, u shpreh zyrtari i BE.
I pyetur nëse gjatë takimeve që pati sot me kryeministrin Rama dhe kryedemokratin Basha, u dhanë sinjale për një dialog mes tyre për zgjidhjen e krizës, Danielsson tha: “Jo, nuk është se dëgjova një gjë të tillë”.
