Në një prononcim për mediat, zyrtari i BE-së Christian Danielsson, e ka cilësuar si një fatkeqësi faktin se Shqipëria pak muaj para vendimit për çeljen e negociatave me BE-në ndodhet në një mungesë stabiliteti, dhe për këtë bëri përgjegjëse të dyja palët, qeverinë dhe opozitën.
“Është fatkeqësi që Shqipëria gjendet në pasiguri, dhe në mungesë stabiliteti. Pasiguria të tejkalohet në mënyrë urgjente. Të gjitha forcat politike të kryejnë veprime të përgjegjshme, për të dhënë rezultate në reforma.
Udhëheqja e përgjegjshme do ketë në dorë fatin e këtij vendi, dhe në tryezën e negociatave në BE. Edhe në takimet e sotme kam qenë shumë i qartë”, u shpreh Christian Danielsson.
Drejtori i Përgjithshëm për Zgjerimin në BE, u ndal edhe te vendimi i opozitës për djegien e mandateve. Për të, vendimi në fjalë minon rrugëtimin drejt integrimit në BE.
“Sa i përket opozitës, theksova se vendimi për djegien e mandateve në bllok minon seriozisht rrugëtimin e vendit në integrim, Parlamenti është shtylla e shtetit.
Nga ana tjetër edhe e drejta për të protestuar është element i rëndësishëm, por të jenë të paqme. Ata që janë përgjegjës të përmbahen e të mos të nxisin dhunë.
Nxitja e dhunës është shqetësim i madh për ne. Parlamenti është i domosdoshëm dhe duhet të luajë rolin e vet plotësisht, kjo është përgjegjësia e shumicës, por edhe opozitës”, u shpreh zyrtari i lartë i BE.
