Si në vendin tonë, edhe në Greqi po vijojnë ditët e ferrit. Flakët po shpërndahen më gjerë, nga pyjet deri brenda shtëpive. Banorët janë alarmuar dhe situata është tepër e rëndë, ku flakët po marrin gjithçka përpara.
Një moment prekës u transmetua në televizionin grek OPEN të hënën pasdite. Gazetarja Eulambia Revi, e cila raporton për zjarret në Avgaria, të ishullit Evia, shpërtheu në lot pas intervistës që pati me një të moshuar, i cili prej ditësh po lufton me flakët.
Gazetarja përpiqet ta bindë të moshuarin të largohet nga zona, por ai nuk pranon të lërë shtëpinë. Ajo hap çantën e saj në lidhjen LIVE, dhe i ofron atij një maskë për ta mbrojtur.
“Unë nuk mund të flas. Kam që në mesditë që hedh ujë në shtëpi. Nuk fle. Kam frikë për shtëpinë, jo për veten”, thotë ai.
“Po, por duhet të largohesh, ke probleme me frymëmarrjen”, i thotë gazetarja, ndërsa ai ia kthen: “Dhe ku të shkoj?”.
Në këtë moment i moshuari dhe gazetarja nisin të qajnë. Pamjet janë bërë virale, ndërsa dëshmojnë situatën në të cilën ndodhen.
