Gjykata e Posaçme ka dënuar me 4 vite burg dhe 5 vite ndalim të ushtrimit të funksioneve publike ish-sekretarin e përgjithshëm të ministrisë së Mjedisit Alqi Bllako për inceneratorin e Tiranës.
Pas një seance maratonë që nisi në 9:30 të mëngjesit, trupës gjykuese e kryesuar nga Rudina Palloj iu deshën rreth 9 orë ta shpallë vendimin e fajësisë për korrupsion pasiv për përfitim të 119 mijë euro, dhe 7 milion lekë, teksa dënimi i zbret me 1/3 për shkak të gjykimit të shkurtuar në 2 vite e 8 muaj burg. SPAK kërkoi një vit më shumë se sa vendosëm togat e zeza. Sipas avokatëve, Bllako do të lirohet nga qelia pasi gjykata vendosi shuarjen e masës nëse nuk qëndron në burg për ndonjë vepër tjetër penale. Gjatë shqyrtimit gjyqësor prokurori Dritan Prençi pranoi se Gjykata e Durrësit e ka liruar me kusht për inceneratorin e Elbasanit, teksa Bllakos iu shua masa sipas mbrojtjes pas rikualifikimit të veprës penale për inceneratorin e Fierit.
Alqi Bllako u rigjykua në Shkallën e Parë për Tiranën pas vendimit të Apelit që konstatoi shkelje proceduriale, për këtë çështje. Fillimisht ishte dënuar me 4 vite burg, dënim i cili zbriti në 2.8 vite për shkak të gjykimit të shkurtuar për veprën penale të korrupsionit pasiv. Ish-deputeti socialist mbajti qëndrim mohues për akuzat para se të jepej vendimi, duke kërkuar pafajësi.
Bezhanin tha Bllako e ka njohur pasi ka nisur punën si sekretar i përgjithshëm. Alqi Bllako parashtroi në gjykatë edhe rrethanat familjare dhe fëmijët e mitur për njërin prej të cilëve tha se po e përjeton shumë rëndë mbajtjen e tij në burg.
Ish-ligjvënësi socialist është dënuar për Inceneratorin e Elbasanit për shpërdorim detyre me 4 vjet burg, që i zbriti për shkak të gjykimit të shkurtuar në 2,8 vite. Prokurori Dritan Prençi relatoi se Gjykata e Durrësit për këtë vendim që ka marrë formë të prerë, ka vendosur lirimim me kusht për pjesën e mbetur. Por ndërkohë, Bllako ka dy masa të tjera sigurie, për Fierin që u dënua përfundimisht me 2 vite e 8 muaj për korrupsion në bashkëpunim dhe shpërdorim detyre, por që çështja ndodhet në Apelin e Posaçëm pasi ky vendim u prish nga Gjykata e Lartë dhe për Inceneratorin e Tiranës ku akuzohet për korrupsion pasiv dhe që u dënua këtë të martë. Alqi Bllako mbahej në burg me një lirim të përkohshëm një mujor prej marsit të vitit 2023./ Nga Fatjon Gjinaj
