Kryeministri Edi Rama ditën e sotme në Kuvend, komentoi Reformën Zgjedhore teksa u ndal edhe tek ambasadorët.
Kreu i Qeverisë ndër të tjera theksoi se ambasadorët “bëjnë arbitrin duke parë ping-pongun shqiptar”:
“Më vjen shumë keq që në vitin 2020 politika shqiptare ka akoma nevojë për ambasadorë të huaj që të hyjnë në mes.
Kjo është një gjë që mjafton për të treguar stadin adoleshent të politikës shqiptare dhe për liderë politikë që për gjëra që kanë interes të përbashkët partiak të mos ngrenë telefonin dhe të mos thonë “për këtë duhet të flasim”.
Një fatkeqësi që tregon shumë. Nuk i kam kërkuar unë ambasadorët, por duke qenë se të tjerët e kishin të pamundur të uleshin shqiptarë me shqiptarë, ishin të gatshëm të uleshin me 3 palë përkthyes shqip-shqip…ne e pranuam.
Ata bëjnë arbitrin duke parë ping-pongun shqiptar, ping-pong pa top, që herë të kujtojnë raketën, herë dorezën e boksit”.
Në vijim, kryeministri u shpreh se kush ka votat në Parlament ka të drejtën të bëjë reformat që sheh të arsyeshme:
“As në Itali, as në Greqi, as në Francë nuk bëhen me konsensus reformat elektorale.
Kush ka votat në Parlament ka të drejtën të bëjë reformat që sheh të arsyeshme.
Është detyrimi i të gjitha palëve të respektojnë parlamentin”.
