Zgjedhjet u mbyllën dhe rezultati ishte dukshëm në favor të Partisë Socialiste, por akuzat e partive politike për korrupsion dhe shit-blerje të votës dominuan sërish edhe në këtë fushatë. Vetëm 21 persona po ndiqen penalisht për krime zgjedhore në të gjithë vendin. Një punonjës policie u arrestua, ndërsa disa të tjerë janë pezulluar dhe po hetohen.
Ja qytetet ku u arrestuan persona për shitje apo blerje vote
Tiranë, tre të arrestuar
Dy ditë para zgjedhjeve, një rast i denoncuar nga emisioni “Stop” në TV Klan pas filmimeve me kamera të fshehta përfundoi me arrestimin e tre personave të përfshirë në Tiranë-të dyshuar për blerje votash.
Policia njoftoi arrestimin e Arben Markut, që shfaqej në video duke paguar për votën për Partinë Socialiste,
Luan Nela personin që mori paratë dhe po ashtu
Luan Imeraj, që sipas policisë i përkiste LSI dhe kishte nxitur videoincizimin duke i ofruar Nelës një vend pune në rast se ai e kryente atë.
“Këta shtetas janë arrestuar pasi në kameran e fshehtë pasqyrohen veprimet korruptive të shtetasit Arben Marku, i cili në këmbim të blerjes së votës jep një shumë monetare shtetasit Luan Nela. Është arritur të dokumentohet me prova ligjore se Luan Nela përfiton shumën e parave…Nga hetimet e kryera ka rezultuar gjithashtu se shtetasi Luan Nela ka pranuar të bëjë regjistrimet audio dhe video në këmbim të një vendi pune të premtuar nga shtetasi Luan Imeraj, i cili është përkrahës i LSI”, thuhej në komunikatën e policisë për këtë rast.
Elbasan, një i arrestuar
Arrestohet një person me akuzën e dhënies së shpërblimeve dhe premtimeve dhe rrezikon deri në 2 vite burg. I arrestuari sipas policisë i përket PDIU, e cila fitoi një mandat më shumë në qarkun e Elbasanit, krahasuar me zgjedhjet e 2013 dhe gati i trefishoi votat e saj.
Librazhd, një i arrestuar
Ndalohet shtetasi që u kap ditën e zgjedhjeve me sasi të konsiderueshme të hollash dhe ushqimesh, personi i përfshirë i përket PDIU.
Cërrik, një i arrestuar
Një person po ndiqet penalisht për blerje vote. I akuzuari sipas policisë është një person pranë LSI-së.
Shkodër, tre të arrestuar dhe katër të hetuar
Në këtë qytet po ashtu u raportuan tre raste të blerjes së votës.
Policia arrestoi Izmir Bushajn, një doganier që sipas saj po blinte vota për LSI.
Gëzim Bushaj që akuzohet se po e shiste votën dhe shoqëroi kryetarin e Partisë Social Demokrate të Shkodrës.
Përparim Rraboshta i cili shpërndau ndihma ushqimore për familjet egjiptiane një ditë para zgjedhjeve. Rraboshta, për PSD-në e të cilit garonte Tom Doshi dhe që arriti rekord në këto zgjedhje në Shkodër duke nxjerrë për herë të parë një kandidat fitues, i cilësoi akuzat politike.
Ndërkohë katër persona të tjerë dhe një punonjës i KESH (Korporata Elektroenergjetike Shqiptare) po ashtu u shoqëruan, por u lanë të lirë pasi policia gjeti se ekonomisti po shpërndante një ditë para zgjedhjeve çeqet e dëmshpërblimeve për përmbytjet e 7 viteve më parë.
Korçë, dy të arrestuar
Një 55-vjeçar përfundoi në pranga ditën e zgjedhjeve, me akuzën se po tentonte të blinte vota në favor të LSI-së. Pajtim Myrtollari, koordinator i LSI-së në një lagje të Korçës ishte arrestuar për të njëjtën akuzë edhe në zgjedhjet e vitit 2013, por gjykata e shkallës së parë e kishte shpallur më pas të pafajshëm ndërsa akuzat ishin amnistuar ndërkohë që çështja e tij ndodhej në Apel. Avokati i Myrtollarit i cilësoi akuzat politike.
Një koordinator tjetër i një force politike, po hetohet në gjendje të lirë pasi iu gjetën 170 mijë lekë që dyshohet se do i përdorte për të blerë zgjedhës dhe paguar komisionerë.
Vlorë, tre të arrestuar
Tre persona u referuan në Prokurorinë e Vlorës me akuza për blerje të votës. Policia thotë se ata janë ndaluar më 23 qershor, ndërsa nuk ka bërë me dije se për llogari të kujt subjekti politik do të bleheshin votat.
Delvinë
Një drejtuese lokale e PS denoncoi ditën e zgjedhjeve një përfaqësues të LSI, të cilin sipas policisë ajo nuk e njihte, që po “shpërndante vlera monetare në këmbim të votës”. Policia tha se rasti po hetohej dhe mbetej pa autor.
Fier
I vetmi rast i denoncuar nga një qytetare nuk u arrit të verifikohej nga policia.
Berat, kallëzim ndaj deputetit të LSI-së
Rasti i parë i një deputeti të akuzuar për korrupsion në zgjedhje u shënua në Berat. Disa funksionarë të LSI-së, përfshirë edhe deputetin Gledion Rehovica u kallëzuan nga policia e Shtetit në Prokurorinë e Përgjithshme.
