Austria do të mbajë këtë vjeshtë zgjedhjet e parakohshme parlamentare. Ato u lajmëruan nga kancelari Sebastian Kurz, pas publikimit të një video-skandali me protagonist zv/kancelarin, njëherazi aleatin e tij në koalicion, Heinz Strache.
Ai është filmuar duke biseduar me mbesën e një oligarku rus, të cilës i premton tendera rrugësh, në këmbim të mbështetjes financiare për partinë e tij. PD, LSI dhe mediat pranë tyre, kanë vënë në dukje kontrastin e thellë, që ekziston mes Edi Ramës dhe Sebastian Kurz. Rastet kanë specifikat e tyre. Por fakt është se në Shqipëri, dorëheqja cilësohet jo si një akt normal demokratik, si në Austri dhe Perëndim.
Ajo konsiderohet nga politikani dhe militanti, që e mbështet verbërisht si zhburrërim, dhe si disfatë e plotë, pas së cilës gjithçka merr tatëpjetën. Nga viti 1992, e këtej, asnjë kryeministër nuk ka dhënë dorëheqjen, pas ndonjë skandali korruptiv.
Në dhjetor 2010, videoja Meta-Prifti, faktoi me zë e figurë korrupsionin e kreut të LSI. Meta dha dorëheqjen, por Sali Berisha, as që e çoi ndërmend të çonte vendin drejt zgjedhjeve të reja, ku të provonte të fitonte pa aleatin e tij të kompromentuar.
Përkundrazi, tregoi forcën më 21 janar 2011. Duke marrë shkas nga kjo traditë bajraktarësh, edhe Edi Rama e ka të vështirë të tërhiqet, për t’i hapur rrugë një zgjidhje më të lehtë të krizës politike aktuale. Ai citon shpeshherë argumente kushtetuese që janë të drejta.
Por presioni nga baza e PS për të mos bërë asnjë lëshim, është shumë i madh. Prandaj, jemi shumë larg Austrisë, si për standardet ekonomike, ashtu edhe për kulturën politike.
Bisedimet me BE-në, mund të çelen në qershor ose shtator. Por rruga deri tek anëtarësimi, do të jetë e gjatë, pikërisht për shkak të këtyre 2 faktorëve./ Tirana Today
