Kreu i Grupit Parlamentar të PS-së, Taulant Balla, ka zhvilluar një mbledhje me anëtarë dhe simpatizantë të PS-së, ku është shprehur se zgjedhjet e brendshme në këtë parti, po zhvillohen në formën e një debati konstruktiv në çdo organizatë.
Përmes një postimi në Facebook, Balla shprehet se këto zgjedhje nuk janë si ato të viteve të shkuara, por i cilëson ato si një proces hapje ndaj çdo personi që është i gatshëm të japë kontributin e tij për këtë vend.
Postimi i plotë:
Zgjedhjet e brendshme në Partinë Socialiste?? po zhvillohen në formën e një debati konstruktiv në çdo organizatë. Debat me simpatizantët dhe me çdo qytetar që dëshiron të marrë pjesë në bashkëbisedim, pavarësisht bindjeve të veta dhe përkatësisë së vet, debat në çdo lagje, në çdo fshat në çdo njësi administrative dhe bashki.
Zgjedhjet tona të brendshme nuk po i ngjajnë zgjedhjeve të viteve të shkuara, por një procesi hapje shumë reale të Partisë Socialiste në të gjitha nivelet tona të organizimit e në të gjitha nivelet e administrimit të punëve të këtij vendi ndaj njerëzve të zotë, të gatshëm të japin kontributin e tyre për Shqipërinë.
