Ish-deputetja demokrate, Grida Duma, shprehet se tashmë është arritur një vetëdijesim i lartë se pushteti i Ramës i bën keq shqiptarëve.
E ftuar në “Kjo Javë”, në News 24, Duma foli për aksionet e radhës që do ndërmarrë opozita teksa shprehet se pas gjithë këtyre muajve rezistencë, ata arritën t’ia “çjerrin maskën” kryeministrit Rama.
“Situata nuk është e njëjtë, kemi momentin më të lartë të vetëdijësimit, që pushteti i Ramës i bën keq shqiptarëve. Opozita gjithë betejën nuk po e bën për pushtetin e saj. Po tregojmë qartësisht se e nisëm këtë betejë për votën e lirë dhe nuk u tërhoqëm në asnjë çast. E kemi pasur të vështirë të depërtojmë në veshët dhe mendjet e njerëzve. Që nga shkurti deri tani janë disa muaj, nga momenti në të cilin shqiptarët mendonin se paratë e zeza nuk mundeshin dot. Në këto pak muaj qëndresë, sot kemi arritur në shkallën e parë, mund ta quajmë të dytën, që ky Rama nuk është njeriu që kamuflohet pas kamerave. I është çjerrë maska. Unë nuk them që 85% e qytetarëve janë votues të opozitës, por ama tregojnë se ata kuptuan që beteja për këtë sistem të rrënuar ishte mospjesëmarrja”, tha Duma.
Më tej, kur Duma u pyet se si do arrijnë ta largojnë kryeministrin Rama, ish-deputetja tha se:
“Do ikë me votën e lirë. PD dhe opozita do vijnë në pushtet nëpërmjet votës. Nëse qytetarët kanë bindjen se përpjekja e Ramës është të mbahet me zor në karrigen e kryeministrit, padyshim që kjo është një hap më tej. I takon opozitës të veprojë, në ndërtimin e një sistemi. Sot mazhoranca e shqiptarëve nuk e shohin Ramën si kryeministër”.
Ish-deputetja foli edhe sa i përket datës 13 tetor, të caktuar nga Presidenti për zhvillimin e zgjedhjeve duke u shprehur:
“Arsyeja pse thuhet që Rama s’duhet të jetë kryeministër, pasi ikja e tij është valvula që ne do ndërtojmë një sistem të pakapur. Nuk është kryeministri, por Edi Rama në këtë rast. U vërtetua sa lidhje kishte krijuar me bandat kriminale për të ardhur në pushtet. U provua që ky njeri e ka mbajtur pushtetin me grupimet kriminale, derisa arritëm që Holanda të kërkojë rikthimin e vizave”.
