Artemis Malo ka marrë ditën e sotme mandatin e deputetit për qarkun e Gjirokastrës.
Dorëzimi i mandatit u bë gjatë mbledhjes së ditës së sotme të zhvilluar nga Komisioni Qendror i Zgjedhjeve. Malo del nga listat shumemërore të Partisë Socialiste në Gjirokastër.
Ky emërim vjen fill pas dorëheqjes së deputetit socialist Flamur Golemi, i cili tanimë do kandidojë për kryetar bashkie për zonën e Gjirokastrës në zgjedhjet e 30 qershorit.
Kujtojmë që ky nuk është posti i vetëm zyrtar që mban Artemis Malo pasi që nga tetori i vitit 2017, ajo mban detyrën e Zëvendësministres për Evropën dhe Punët e Jashtme. Ndërsa më herët këtë muaj ajo është zgjedhur Anëtare e Asamblesë së Partisë Socialiste të Shqipërisë.
Deputetja Malo i përket komunitetit minoritar grek.
