Një prej zërave kritik ndaj kryedemokratit Basha, Edvin Kulluri tha se tubimi i 2 marsit tregoi se opozita nuk është më në dorë të Bashës, por të presidentit Ilir Meta. Sipas Kullurit, Kreu i Shtetit bëri atë që duhet të kishte bërë opozita e drejtuar nga Basha, e cila dështoi në aksionin e saj.
Ai tha se Meta po luan rolin e drejtuesit të opozitës. Duke zbardhur skenarin, Kulluri shtoi se njerëzit të cilët janë kundër mazhorancës, janë drejtuar tek tubimi i Metës. Për të, Basha duhej të ishte në krye të mitingut, e ndërsa Meta dëshmoi se mund të marrë drejtimin e opozitës.
“Pjesëmarrja e djeshme besoj si ishte e rëndësishme. Njerëzit iu përgjigjën thirrjes së presidentit duke shkuar në shesh për çështjet që ai ka ngritur. Por thelbi i protestës së djeshme është që ne sot kemi një mazhorancë me një pushtet absolut mbi 3 pushtetet, përballë një opozitë që ka dështuar.
Dje Ilir Meta ka pasur sukses, në një protestë kundër një mazhorance absolute. Me afatin që vuri presidenti për tërheqjen e ligjit për emërimet në Gjykatë Kushtetuese, nuk kemi parë reagim nga mazhoranca, por Rama nuk do të tërhiqet.
15 marsi dhe vajtja e presidentit Meta për shpërndarjen e Parlamentit është një skenar që mund të tensionojë situatën. Meta sot luan dhe rolin e drejtuesit të opozitës. Kjo uri që kanë njerëzit kundër mazhorancës, i ka bërë që të shkojnë të Meta ku duhet të ishte Basha në krye të mitingut. Dalja dje në shesh e Metës, akt i fortë, bëri atë që nuk bëri Basha”, tha Kulluri në “Report TV”.
Kulluri u shpreh më tej se për të rikthyer besimin tek qytetarët, do të krijohet poli i djathtë, që sipas tij do t’i sigurojë të djathtës 700 mijë vota, ku do të ftohen të gjithë aleatët e të djathtës.
“Basha është shumë vonë që të bashkojë popullin kundër Ramës, sepse e dëmtoi këtë popull me atë që bëri në 2017, por e thelloi gabimin e tij duke djegur mandate dhe bojkot të zgjedhjeve. Rama sot kërkon që t’i kapë të gjitha pushtetet. Duke parë aksionin e drejtuar nga Basha, lind nevoja për dalje në zgjedhjet e ardhshme me polin e djathtë. Unë gjykoj se pas gabimeve të Bashës, nuk ka asnjë reflektim për hapjen e PD. Kjo kokëfortësi për të mbajtur partinë e mbyllur, ka bërë që besimi i opinionit të jetë në kuotat minimale i shpjeguar prej rezultatit të vitit 2017. Nuk janë blerë 330 mijë demokratë, dhe kjo është turp që të akuzosh demokratët që kanë shitur votat. Po nuk u bashkua elektorati i djathtë në një platformë të qartë të djathtë, nuk ka asnjë shans që të kemi rotacion. Ftesa për Bashën nga ky grup i madh kritik, të ndryshojmë qeverinë e këtij vendi të fitojmë zgjedhjet. E kërkojmë për bashkuar të djathtën. Nga Basha nuk ka asnjë reflektim, PD është e mbyllur. Ka nisur puna për t’i dhënë një zgjidhje rrëzimit të Edi Ramës. Do bëjmë një koalicion me partitë e djathta pa Lulzim Bashën, pasi ai nuk do rrëzimin e Ramës. Duam të çojmë mbi 700 mijë vota për të djathtën, ndërkohë që Basha siguron vetëm 400 mijë. Ky është një front kundër Edi Ramës”, tha Kulluri.
Kulluri deklaroi se pas 15 marsit do të ketë dhe zhvillime. Sipas tij, poli do të jetë me të gjithë aleatët e djathtë, ku dhe pse vetë Basha është i njohur me këtë lëvizje, nuk ka dëshirë për të ndihmuar këtë koalicion, i cili do të bëhet dhe pa të. Koalicioni, sipas Kullurit do të bëhet dhe me figura publike dhe kontribut që janë kundër modelit autokratik të Bashës në drejtimin e PD, duke lënë hapësirë për të gjithë kritikët e tij.
Meta dje u tregua i drejtpërdrejtë, ku me doza të forta opozitarizmi hodhi një sërë akuzash në drejtim të mazhorancës, ndërsa nuk munguan edhe paralajmërimet për shumicën qeverisëse. Ai tentoi të merrte frenat e opozitës dhe eklipsuar rolin e Bashës. Presidenti Meta e mbylli fjalën e tij duke thënë se demokracia nuk rrezikohet kur populli ngrihet për të mbrojtur Kushtetutën.
Nga ana tjetër, Basha foli shkurtimisht për mediat në mbyllje të tubimit, teksa deklaroi se kishte dalë si qytetar. “Kjo nuk është një protestë, është një tubim drejtuar gjithë qytetarëve shqiptarë në mbrojtje të Kushtetutës, dhe unë këtu ndodhem si qytetar, si prind, si bir nëne e babai, si bashkëshort dhe si bashkëqytetar i juaji. Unë kam dalë bashkë me miq të nderuar, me zotin Mustafaj, me zotin Bisha dhe miq të tjerë për të dhënë mesazhin e qartë se ky është tubim qytetar”, deklaroi ai.
