Qeveria e Kosovës ka futur në fuqi reciprocitetin ndaj Serbisë, përsa u takon targave të automjeteve. Presidenti i Serbisë, Aleksandar Vuçiç, ka kërcënuar haptazi Kosovën e kryeministrin Kurti, se nëse nuk ndryshojnë vendimin, do të përballen me pasojat.
“Ne duam të tregojmë vullnet të mirë dhe t’i japim kohë Prishtinës për të ndryshuar vendimet e këqija. Nëse ata nuk duan, ne do të marrim masa për të mbrojtur Serbinë”, tha Vuçiç pas seancës së Këshillit të Sigurisë Kombëtare.
Duke iu rferuar vendimit të autoriteteve të Kosovës, të gjitha automjetet që mbajnë targa të Serbisë dhe hyjnë në Kosovë, duhet të pajisen me targa të përkohshme, që sipas këtij vendimi, mund të bëhet në të gjitha pikat kufitare të Kosovës.
Targat duhet të vendosen në vende të dukshme, dhe për vendosjen e tyre do të ketë një pagesë prej 5 eurosh.
Dje, kryeministri i Kosovës, Albin Kurti, sqaroi vendimin e qeverisë për vendosjen e reciprocitetit për targat serbe në Kosovë. Kurti u shpreh se vendimi i marrë nuk është dëshirë e qeverisë së tij, por janë të imponuar nga pala serbe.
