Opinioni publik është tronditur nga ngjarja e rëndë në Fier, ku një 38-vjeçar ka rrëmbyer dhe më pas ka vrarë fëmijën e fqinjit të tij. Në fshatin Greçalli të Fierit, ka pllakosur zia! Banorët e fshatit janë të shokuar nga çfarë ka ndodhur. Autori Klodian Çalamani, 38-vjeç, vrau 8-vjeçarin Mateo Vasiu.
Një banore e fshatit shprehet se autori, Klodian Çalamani, 38-vjeç, i dënuar më parë për pengmarrje, ishte një person i çekuilibruar dhe problematik në fshat.
Shumë personazhe të njohur të ekranit shqiptar, kanë dënuar aktin e rëndë, dhe disa prej tyre madje kërkojnë dënimin me vdekje.
Kush është Klodian Çalamani? Një ngjarje e paralajmëruar…
Klodian Çalamani, në 2006 është autor i një tjetër pengmarrje. Ai së bashku me shokun e tij, Florian Vasiu, 25-vjeç, nga fshati Greçalli, kanë marrë peng një vajzë, atëherë 16-vjeçare. Florian Vasiu pëlqente vajzën, por ajo nuk i përgjigjej kësaj ndenje, pasi ishte e lidhur me dikë tjetër. Pikërisht i dashuri i saj ka ndaluar të rinjtë dhe i kanë thënë që të mos e bezdisnin më vajzën. Ky veprim i të dashurit të vajzës, ka acaruar Çalamanin dhe Vasiun, të cilët e kanë marrë peng dhe e kanë torturuar për 20 minuta, duke e kërcënuar se do i shëmtonin pjesë të ndryshme të trupit, më konkretisht gjoksin duke ia prerë me biçak.
Nga hetimet e Prokurorisë së Fierit ka rezultuar se për të arritur qëllimin e tyre, Klodiani ka kërcënuar edhe motrën e tij, E. Çalamani, e cila është përdorur për të futur në kurth adoleshenten. Aso kohe, dy të rinjtë u dënuan nga Gjykata e Fierit, me nga katër vjet burg për veprën penale të heqjes së lirisë të kryer në bashkëpunim, bazuar në nenin 110/2 të Kodit Penal. Ai u lirua nga burgu i Rrogozhinës me datë 06.08.2009.
