Zbardhen detaje të reja tronditëse në lidhje me vrasjen e 20-vjeçares britanike Caroline në Greqi, nga bashkëshorti i saj, Charalambos Anagnostopoulos.
Autoritetet policore në vendin fqinj, kanë zbuluar momentet e fundit të përjetuar nga e reja, derisa piloti 32-vjeçar i ka marrë jetën. Mësohet se pak pas mesnatës së datës 11 maj, në orë 00:35, kamera e sigurisë ka filmuar pamjet e fundit.
Anagnostopoulos shihet duke përqafuar vajzën e tij, teksa shfaqet i nervozuar duke shkëmbyer mesazhe me Caroline, pasi marrëdhënia e tyre ishte në gjendje kritike, aq sa ajo i kishte kërkuar divorcin.
Më pas, në orën 01:20 piloti heq kartën e memories nga kamerat e sigurisë, dhe për rreth dy orë e 40 minuta, çifti debatonte ashpër me mesazhe.
Në orën 04:01 ora inteligjente e vajzës tregon stimulim intensiv të pulsit. Nga ai moment dhe për dhjetë minuta të tëra, e reja ka luftuar për ajër ndërsa bashkëshorti i mbyllte hundën dhe gojën derisa më në fund u dorëzua. Sipas orës inteligjente, në 04:11 të mëngjesit, zemra e Caroline pushoi së rrahuri.
Si tentoi 32-vjeçari të manipulonte vrasjen
Duke iu referuar dëshmisë së rreme të bashkëshortit të saj, tre persona, të cilët shkuan për të grabitur një shtëpi në Greqi, përfunduan duke vrarë 20-vjeçaren britanike, qenin e familjes dhe duke torturuar edhe vetë atë. 20-vjeçarja u gjet e vrarë në papafingo të shtëpisë, pranë krevatit të fëmijës së saj 11 muajsh, ndërsa burri i saj 32-vjeç, kishte krijuar një skenë sikur ishte i lidhur në një karrige në dhomën e gjumit. Ishte ai që njoftoi policinë duke i rënë telefonit me hundë (sipas tij), por bashkëshortja kishte ndërruar jetë prej kohësh.
Caroline u vra në të gdhirë të 11 majit. Bashkëshorti i së ndjerës tha se tre autorë të maskuar thyen një dritare të shtëpisë së tyre, dhe hynë brenda ku po flinin çifti dhe foshnja e tyre 11 muajshe. Ata lidhën 32-vjeçarin, ndërsa në përpjekjen për të neutralizuar 20-vjeçaren që po rezistonte, e mbytën. Sipas 32-vjeçarit, autorët e krimit kanë marrë 15.000 euro që ishin në një kuti. Dyshimet u shtuan për policinë, pasi autorët nuk kishin lënë asnjë gjurmë dhe as nuk morën celularët e çiftit.
