Mediat greke vijojnë të raportojnë lidhur me vrasjen e 20-vjeçares Caroline Crouch. ADN-ja e bashkëshortit është gjetur tek shiriti izolues. Dyshime të forta ka edhe lidhur me psikologen e së ndjerës, ndërsa ajo dinte gjithçka mbi çiftin.
Ngjarja që tronditi Greqinë e jo vetëm, ka ndodhur pak javë më parë. Tre persona, të cilët shkuan për të grabitur një shtëpi në Greqi, përfunduan duke vrarë 20-vjeçaren britanike, qenin e familjes dhe duke torturuar bashkëshortin e të resë. 20-vjeçarja u gjet e vrarë, në papafingo të shtëpisë, pranë krevatit të fëmijës së saj 11 muajsh, ndërsa burri i saj 32-vjeç ishte i lidhur në një karrige në dhomën e gjumit.
Policia ka gjetur shenjat e gishtave të pilotit (bashkëshortit) në shiritin izolues. Duke u bazuar tek dëshmia e tij, ai ua dha shiritin autorëve për ta gruan e tij, nën kërcënimin e një arme.
Kamerat në zonë nuk tregonin automjetin e arratisjes së autorëve. As përshkrimi i 32-vjeçarit nuk i ka ndihmuar efektivët e policisë, për zbulimin e autorëve.
Nën hetim është vënë edhe Eleni Mylonopoulou, gruaja që paraqitet si psikologe, e cila kishte fituar besimin e Caroline dhe kishte zbuluar shumë detaje të jetës së 20-vjeçares. Oficerët e EL.AS theksojnë se kjo zonjë është një “objekt hetimi”, dhe është një “person që është me interes për autoritetet dhe duhet të hetohet”.
Policia do të hetojë nëse psikologia ka dhënë pa dashje disa informacione të rëndësishme, të cilat mund të kenë përfunduar tek autorët. Shoqata e Psikologëve Grekë i kërkojnë Znj. Mylonopoulou të paraqesë brenda dy ditësh gradën e Psikologjisë dhe licencën.
Sipas mediave greke, psikologia kishte dëshmuar në polici se ata ishin një çift shumë i lumtur dhe i afërt. Piloti e shoqëronte gruan e tij në çdo seancë. E ndjera kishte shkuar për ta takuar psikologen, në mënyrë që të ishte një nënë sa më e përgatitur.
“Për këtë çift, unë kam vetëm më të mirën për të thënë. Ata gjithmonë bashkoheshin. Caroline nuk kishte shoqe. Ajo ishte një fëmijë 20-vjeç, e pashë si fëmijën tim. Ajo donte këshillën time sepse ishte pak e shqetësuar, por nuk kishte frikë nga asgjë. Ajo ishte një fëmijë e qeshur, me qëllime, ankthi i saj kishte lidhje me fëmijën e saj.
Para se të lindte, ajo kishte pësuar një abort spontan, ajo gjithashtu lindi Lydia-s para kohe, kështu që ju e kuptoni pse kishte ankth. Babis ishte shumë mbështetës në gjithçka”, ka thënë ajo.
