Pas rrëzimit të dekretit të Presidentit Ilir Meta, Kuvendi votoi sot ndryshimet në Kodin Zgjedhor.
Për Sekretarin e Përgjithshëm të PD, Gazment Bardhi me këtë votim, Shqipëria sot është më pak demokratike, teksa e ka krahasur kryeministrin Rama me presidentin bjellorus Lukashenko.
Sipas tij, kryeministri Rama për pushtetin e tij personal është gati t’i vërë zjarrin Shqipërisë dhe të pengojë anëtarësimin në BE.
Gazment Bardhi: “Shqipëria sot është më pak demokratike dhe më pak europiane. Qeveria e Edi Ramës është identifikuar në Bruksel dhe kryeqytetet kryesore europiane si një qeveri që punon kundër integrimit europian dhe kundër interesit të qytetarëve. Me refuzimin që i bëri thirrjeve të përsëritura të BE, Rama nuk ndryshon nga Lukashenko.
Për pushtetin e tij personal është gati t’i vërë zjarrin Shqipërisë, t’i ndërshkojë shqiptarët duke penguar me dashje hapjen e anëtarësimit të vendit në BE. Injorimi i thirrjes së BE për opinionin e Komisionit të Venecias, e izolon tërësisht Shqipërinë dhe e fut në hartën e vendeve që janë në kurs përplasje me Europën. Kjo është përgjegjësi e një njeriu që pushtetin e tij personal e vendos mbi interesin e Shqipërisë dhe shqiptarëve”.
