Një shkodran është ekstraduar nga Interpoli nga Kroacia në drejtim të Shqipërisë. 29 vjeçari është shpallur në kërkim ndërkombëtar për disa akuza. Ndaj tij rëndon akuza e dhënies së ndihmës për të kaluar kufirin në mënyrë të paligjshme si dhe vjedhje me dhunë.
Në nëntor 2018, Gjykata e Shkodrës ka dhënë ndaj tij masën arrest me burg.
Policia bën me dije se i riu nga Shkodra ka ndihmuar të kalojnë 6 pakistanezë kufirin për në Mal të Zi. Për më tepër, në afërsi të kufirit ai ka kërcuar pakistanezët dhe u ka marrë dhe 720 euro, 2 telefona dhe dokumentet e tyre.
Njoftimi i policisë:
Interpol Tirana vijon bashkëpunimin me homologët, me qëllim kapjen e personave të shpallur në kërkim ndërkombëtar dhe dërgimin e tyre para drejtësisë.
Një tjetër i kërkuar nga autoritetet shqiptare ka rënë në pranga falë bashkëpunimit të Interpolit me homologët.
Nga specialistët e Interpol Tirana është bërë ekstradimi nga Kroacia drejt Shqipërisë, i shtetasit shqiptar P. P., 29 vjeç, banues në Shkodër.
29-vjeçari ishte shpallur person në kërkim ndërkombëtar, për kryerjen e veprave penale “Dhënie ndihmë për kalim të paligjshëm të kufirit” dhe “Vjedhja me dhunë”.
Gjykata e Rrethit Gjyqësor Shkodër, në nëntor të vitit 2018, ka vendosur masën e sigurisë “Arrest në burg”.
Ky person u jepte ndihmë shtetasve të huaj për të kaluar në mënyrë të paligjshme nga Shqipëria në Malin e Zi, duke pasur si destinacion vendet e Evropës Perëndimore.
Shërbimet e Policisë Kufitare Shkodër, në shtator të vitit 2018, kanë konstatuar 6 shtetas pakistanezë, të cilët synonin të kalonin në Malin e Zi, të ndihmuar nga shtetasi P. P., i cili pasi i kishte afruar në kufi me Malin e Zi u kishte marrë nëpërmjet kanosjes 720 euro, 2 telefona celularë, si dhe 6 çanta ku mbanin dokumentet e tyre. Si rezultat i shkëmbimit të informacionit në kohë me Interpol Tirana dhe Policinë kroate u bë e mundur kapja e këtij shtetasi me qëllim ekstradimin drejt vendit tonë.
