Ish-kryeministri Sali Berisha dhe ish-ministri i Drejtësisë Ylli Manjani kanë publikuar në profilet e tyre në ‘Facebook’ një video që po qarkullon në internet lidhur me vjedhjen e votave të PDIU-së në një qendër numërimi.
Berisha i ka bërë thirrje KQZ-së që të rinumërojë votat në qarkun e Tiranës, por edhe në ato qendra që ka denoncime për manipulime. Ai ka publikuar një mesazh të qytetarit dixhital, i cili akuzon PS-në për tjetërsim të votave të PDIU-së. Berisha i ka bërë thirrje Prokurorisë së shtetit të ndëshkojë me forcën e ligjit kriminelet e votës së shqiptarëve.
Ndërsa Manjani ka bërë identifikim e personit që bën ndryshimin e destinacionit të fletës së votimit duke e kaluar në favor të Partisë Socialiste. Ai thotë se i duhet kjo dorë, rilindjes për të marrë në një dorë çdo gjë! Një dorë nga ata të Hipotekës që Kryeministri i quajti “tepsi”…
Manjani shton se Prokuroria ka material të bollshëm. Ka shumë episode të kësaj natyre të kryera jo thjesht nga numërues, por nga mbajtës detyrash publike gjithashtu!
Kujtojmë se kreu i PDIU-së Shpëtim Idrizi, i cili kandidonte për këtë qark nuk ka siguruar dot votat për të marrë mandatin. Për këtë arsye kjo forcë politike konteston duke theksuar se i janë vjedhur votat.
Postimi i plotë i Sali Berishës në Facebook
Ja si ia vodhi mandatin Noriega PDIU-se!
Qytetari dixhital denoncon:
Vjedhjen e mandatit te PDIU nga Noriega ne qarkun e Tiranes. Ai thote se disponon 19 video per vjedhjen skandaloze te mandateve nga kanibalet e votave te Edvin Kristaq Rames.
I bej thirrje KQZ te rinumeroje nga e para votat per qarkun e Tiranes dhe per cdo qark tjeter ku ekzistojne te dhena per vjedhje te votave. I bej thirrje Prokurorise se shtetit te ndeshkoje me forcen e ligjit kriminelet e votes se shqiptareve.
Lexoni ju lutem mesazhin dhe shikoni videon skandaloze qe ka derguar qytetari dixhital! sb
“Pershendetje doktor, kjo eshte vetem nje prej shume videove qe kemi gjetur nga rregjistrimet e kamerave ku shihet se si PS ka tjetersuar voten e PDIU gjate numerimit. Kemi gjetur skandale te tjeta dhe me te medha se kaq, jane plot 19 video te tjera me akte te dhunimit te votes gjate procesit te numerimit.”
Postimi i plotë i Manjanit në Facebook
Kjo është dora hajdute e një numëruesi Rilindas. Punon në Hipotekë dhe hyri ti japë “një dorë” partisë në zgjedhje!
I duhej kjo dorë, rilindjes për të marrë në një dorë çdo gjë! Një dorë nga ata të Hipotekës që Kryeministri i quajti “tepsi”…
ja ku e ka tepsinë!
Pamjet e videos janë shkëputur nga regjistrimi zyrtar i kamerave të KQZ. Duket qartë se si nga tufa e votave të PDIU, që janë në anën e majtë të numëruesit, hiqet fleta e votimit dhe i bashkohet tufës së votave të PS, që gjenden në anën e djathtë të tij! Flagrante! Ka ndodhur në disa raste kështu.
Tani është radha e KQZ. Kjo lloj hajnie ka ndodhur në shumë raste duke i vjedhur mandatin PDIU për tja dhënë rilindjes së Govatës!
Prokuroria ka material të bollshëm. Ka shumë episode të kësaj natyre të kryera jo thjesht nga numërues, por nga mbajtës detyrash publike gjithashtu!
Nuk ju mjaftoi blerja e votuesve, por edhe jua vodhën votën!
Krim shumë i rëndë ndaj demokracisë!
