Ministrja e Arsimit, Evis Kushi, ka njoftuar sot për vendimin e radhës në lidhje me zgjatjen e periudhës së mësimit plotësues, për shkak të pandemisë. Ajo ka dhënë sot lajmin për shtyrjen e datës së fillimit të vitit të ri shkollor, nga data 13 shtator që ishte planifikuar në 27 shtator 2021.
Ky vendim është marrë për të zgjatur periudhën e mësimit plotësues, i cili nis më datë 1 shtator 2021. Ministrja sqaron se vendimi në fjalë është marrë pas shqetësimeve dhe sugjerimeve të ardhura nga mësuesit dhe prindërit.
“Duke vlerësuar dhe shqyrtuar me kujdes shqetësimet dhe sugjerimet e ardhura nga mësuesit dhe prindërit, vendosëm të zgjasim periudhën e mësimit plotësues deri në nisjen e vitit të ri shkollor, jo më 13 shtator, por më 27 shtator 2021”, shprehet ministrja në statusin e saj në rrjetin social.
Ajo gjithashtu thotë se gjatë periudhës së mësimit plotësues, që nis më 1 shtator, nxënësit nuk janë të detyruar të shkojnë çdo ditë në shkollë.
Nga ana tjetër, mësuesit dhe të gjitha stafet shkollore do të jenë aty me kohë të plotë, për të ofruar krahas mësimit plotësues, edhe veprimtari të ndryshme sportive, artistike dhe kulturore.
