Kryeministri Edi Rama deklaroi sot pas mbledhjes së Kryesisë së PS-së se punësimet dhe drejtoritë nuk janë pronë e PS-së, por e popullit shqiptar. “Proces transformimi dhe hapjeje. Në bazë të disa vendimeve, puna në territor do të zhvillohet paralelisht për analizat e rezultateve qendër për qendër, për të verifikuar cilësinë e përfshirjes së të gjithë anëtarëve të PS-së në zgjedhje, në raport me rezultatet. Dhe njëkohësisht për ta hapur partinë për prurje të reja nga shoqëria pavarësisht moshës, për të krijuar një bazë të re për të ecur më tutje.
Ajo që do të nënvizoja si shumë të rëndësishme edhe nga kjo mbledhje, dhe do ta ndaja me të gjithë publikun dhe të gjithë familjen tonë politike, është një vijë e kuqe e cila është vendosur fort në Kongresin e partisë dhe do të thellohet në vijimësi është se punësimet dhe drejtoritë nuk janë pronë e PS-së, por e popullit shqiptar dhe funksion i qeverisë dhe i të gjitha institucioneve bazuar në Kushtetutën dhe ligjet në fuqi. Kjo nuk është propagandë por vija ndarëse. Nëse në shërbimin civil tanimë kemi garantuar se proceset e rekrutimit tashmë janë procese ligjore, procese me integritet dhe si rezultat i këtyre proceseve shumë njerëz kanë mundur të marrin atë që i takon, në pjesën tjetër të administratës ka një problematikë serioze që duhet qasje me seriozitet. Për këtë jemi të prerë dhe duhet të angazhohemi të gjithë”, deklaroi Rama.
Ndër të tjera u shpreh nuk do të ketë asnjë “pazar” apo negociatë me PD-në, për të shkëmbyer votat për Reformën në Drejtësi për atë territoriale.
“Reforma në Drejtësi është për tu kryer dhe jo negociuar. Në këtë pikë është shumë e qartë se kthim mbrapa nuk ka, dhe kush i bie ndesh Reformës në Drejtësi i bie ndesh interesa të vendit dhe aleancave strategjike.
Këto nuk janë të lidhura. Reforma në Drejtësi nuk është kërkesë partiake, por historike kombëtare. Ndërsa të tjerat janë çështje që patjetër mund të diskutohen. Ne jemi gati të diskutojmë, çdo gjë me PD-në por njëra me tjetrën nuk kanë lidhje fare”, u shpreh Rama.
