Sado e pazakontë që mund të duket, kryeterroristi arab, thuhet se iu vardis për disa kohë yllit të muzikës botërore, duke ëndërruar të martohej me të, edhe pse nuk ishin takuar ndonjëherë bashkë. Kola Boof, ish e dashura e tij në vitet 1990, dëshmon në librin e saj me kujtime, se në atë kohë Bin Laden, bënte një jetë të shfrenuar mes seksit, drogës, dhe vallëzonte vazhdimisht nën rritmet e muzikës perëndimore. Sheiku e cilësonte Uitnin si gruan më të bukur, që ai kishte parë ndonjeherë.
Ai ishte kaq shumë i fiksuar pas saj, sa që mendonte se ajo i përkiste besimit islam, të cilin e kishte lënë pas dore nën ndikimin e kulturës amerikane dhe bashkëshortit të saj, Bobi Braun. Sipas Boof, Bin Laden shprehej vazhdimisht se një ditë do të shkonte enkas në SHBA, dhe do përpiqej të organizonte një takim me Uitnin.
Madje ai kishte planifikuar edhe vrasjen e bashkëshortit të këngëtares, që ajo të ishte e lirë të martohej me të. Bin Laden ishte kaq i marrosur pas këngëtares amerikane, saqë edhe gratë e tij i urdhëronte të stilonin flokët si Hjuston. Në rast se këngëtarja pranonte të martohej me të, ai kishte menduar t’i dhuronte një rezidencë që zotëronte në periferi të Kartumit, në Sudan.
