Update/ Me sa duket protesta nga bizneset për shkak të përfshirjes në skemën e TVSH-së , ditën e sotme ka qenë e ngarkuar me tension që e cila ka sjellë dhe incidentet e para. Pjesë e incidentit është bërë dhe deputeti i LSI-së Endri Braimllari i cili në fakt ky I fundit ka dalë në mbështetje të bizneseve të vogla.
E ndërsa ka qenë i pranishëm në ambientet e një nga tregjeve ku protestohet, Braimllari duket të jetë përfshirë në një konflikt. Në fotot e shpërndara nga LSA-ja deputeti i LSI-së duket të jetë përfshirë në një konflikt verbal, por edhe përplasje.
Ndërkohë në orën 12:00 tregtarët nisën të ngrenë qepenat, ndërsa njëri prej tyre iu përgjigj Ramës për fjalimin e mbajtur pak ditë më parë në Kuvend lidhur me ngritjen e popullit.
“Unë tani do ngre qepenin se vajti ora 12:00. Solidarizohem me protestën e Shoqatës së Biznesit të vogël. Kjo është kasa jonë, e Sali Berishës dhe Edi Ramës. Falemintuam o popull! Do më vinte mirë që ajo Monika ta merrte edhe njëherë çizmen kur tha ai për popullin aty. Se populli nuk është nga ai që thotë ai, e tha për rrushin e vet ai, nuk e tha për rrushin e popullit. Populli të ngre e të ul, ka të hypmet dhe të zbritmet e veta. Prandaj bëjini të fala atij se ka ik gjithë rinia nga Shqipëria”, tha tregtari.
11:40
Këto pamje që shikoni përcjellin situatën në Tregun Ushqimor në Kombinat. Të gjitha dyqanet janë mbyllur për 1 orë. Protesta e tyre është mbështetur edhe nga deputetë të Partisë Demokratike, të cilët kanë dalë në terren.
Deputetja demokrate Jorida Tabaku, thotë se do të qëndrojnë në krah të biznesit të vogël, dhe ka akuzuar Qeverinë se po rrit taksat.
“Një qeveri që dhunon sipërmarrjen përmes taksave të larta nuk është më një qeveri e shumicës së qytetarëve, por e një pakice që përpiqet të imponohet me dhunë. Sot jemi në krahun e atyre që vendosin lirinë e tyre dhe të sipërmarrjes së lirë mbi dhunën arbitrare të një pushteti gati diktatorial”, thotë deputetja Tabaku.
Bizneset të tjera janë mbyllur edhe tek tregu elektrik, tregu çam si dhe në qytete të tjera të vendit. Duke folur për mediat, tregtarët thonë se kostot shtesë që u janë vendosur, rrezikojnë t’i çojnë drejt falimentit.
Protestës i janë bashkuar tregtarët e të gjithë tregjeve në Tiranë si dhe në Elbasan, Fier, Berat e Shkodër.
“Shteti po e shtrëngon sa më shumë. Po ia pi gjakun tregtisë. Asgjë nuk po formalizohet, por po falimenton çdo gjë. Ne vetëm nxjerrim lek, derisa tani do të dorëzojmë çdo gjë. Se nuk mundemi. Që kur ka hyrë 15 janari, ne po e mbyllim dyqanin me minus”, deklaroi një protestues.
“Nuk mund të kalojë biznesi i vogël me TVSH. Njerëzit nuk kanë bukë të hanë. Ne na duhet tani një ekspert kontabël dhe në mënyrë shoqërore më tha do të të kërkoj 30 mijë lekë. por ekspertët e tjerë kërkojnë minimalisht 50 mijë lekë për deklarimin e TVSH-së”, deklaroi një tjetër tregtare.
11:15
Kryedemokrati Lulzim Basha i cili bashkë me deputetët e PD-së i janë bashkuar protestë së biznesit të vogël, ka postuar në video në “Facebook”, ku shkruan: Po ndodh: Biznesi i vogël në protestë!
Tregu ushqimor në Tiranë.
Ndërsa në video dëgjohet zëri i një qytetari ku thotë se: Do t’ia çoj xhaxhi Edi Ramës. Ja ta shikojë ministri Arben Ahmetaj se çfarë ndodh në tregun ushqimorë. Gjithçka është paralizuar.
11:11
Bizneset kanë nisur të ulin qepenat për 60 minuta siç edhe kishin premtuar në shenjë proteste kundër qeverisë për vendimin për të ulur pragun e deklarimit te TVSH-se nga 5 milionë në 2 milionë lekë.
Partia Demokratike është në krah të biznesit dhe deputetet demokrate janë shpërndare nëpër bizneset e vogla.
Mësohet se kreu i demokrateve Lulzim Basha do të jetë me biznesmenët e tregut të Medresesë gjatë protestës.
Kreu i opozitës, Lulzim Basha, zhvilloi takime me përfaqësuesit e biznesit të vogël dhe më pas mblodhi kryesinë dhe Grupin Parlamentar të PD-së, ku edhe u vendos qëndrimi që PD do të mbaj në këto protesta.
08:44
Biznesi i vogël dhe i mesëm do të uli ditën e sotme qepenat në shenje proteste kundër skemës së TVSH-së. Bëhet e ditur se bizneset do të protestojnë në disa zona, duke nisur nga tregu çam, medreseja, tregu elektrik, tregu elektrik, tregu ushqimorë, dyqanet tek rruga e Durrësit dhe e Kavajës.
Kjo ka qenë dhe tema e diskutimit në mbledhjen e djeshme të grupit parlamentar të PD-së.
“Qytetarët mendojnë se presioni duhet zgjeruar, sepse ka patur impakt të madh pas protestës së të enjtes.”, mësohet të jetë shprehur Basha në mbledhje. Ndërkohë, mësohet po ashtu se në vazhdën e protestave, është menduar që brenda kësaj jave të këtë bllokim rrugësh në kryeqytet. TIRANA TODAY
