Ndonëse është shpallur “non grata” nga SHBA-ja, ish-kryeministri Berisha nuk do t’ia dijë. Por përkundrazi, ai ka shtuar dozën e kërcënimeve. Një ditë më parë ai ka dalë me një reagim të fortë në rrjetet sociale. Berisha ka ndarë me ndjekësit e tij në “Facebook”, një nga fjalimet e tij në kohën kur ishte në Kuvend, duke i dërguar kështu një mesazh të fortë kryedemokratit Basha dhe ambasadores së SHBA-së në Tiranë Yuri Kim, se nuk ka ndërmend që të tërhiqet nga politika, e ndërsa pret shtatorin për tu rikthyer si deputet në Kuvend.
Me të tjerash në videon e cila është xhiruar në vitin 2016, Berisha shihet teksa përdor një fjalor fyes ndaj socialistëve, ndërsa thotë se ai nuk tërhiqet dhe se kundërshtarët për të janë plehra e budallenj.
“Jam Sali Berisha o budallenj, nuk tërhiqem unë o budallenj. Jam Sali Berisha, o çakej, që flisni si çakej, e dini si më dukeni mua, plehra më dukeni, se të tillë jeni, para interesit kombëtar nuk njoh askënd tjetër, s’njoh asgjë unë”, ka deklaruar Berisha nga foltorja e Parlamentit në vitin 2016.
Ky paralajmërim vjen disa ditë para se të startojë sesioni i ri parlamentar e politik, një mesazh i fortë ndaj SHBA-së se nuk do braktisë mandatin e deputetit.
Ultimatumi i Berishës vjen disa ditë pas mesazhit të ambasadores së Shteteve të Bashkuara të Amerikës në Tiranë, Yuri Kim. Kjo e fundit, pas një takimi “kokë më kokë” me kreun e PD-së, Lulzim Basha në selinë blu, ia bëri të qartë se SHBA-të nuk e duan në shtator Sali Berishën në Kuvend.
Diplomatja amerikane i kërkoi Lulzim Bashës që të distancohet nga Sali Berisha. “Një parti nuk mund të “hajë bar” për hir të një deputeti”, tha Kim, referuar shprehjes së thënë në komunizëm “edhe bar do hamë dhe nuk do i përkulemi armikut”.
Ndërkohë, i menjëhershëm ishte edhe reagimi i Berishës ndaj deklaratës së ambasadores Kim, i cili po në 30 korrik shkroi në rrjetet sociale se diplomatja amerikane gaboi shumë rëndë me barin që iu përmendi demokratëve, dhe se sipas tij, nuk ka Zot që e ndal atë të mos hyjë në Kuvendin e Shqipërisë si deputet.
Ish-kryeministri Sali Berisha u shpall “non-grata” nga Departamenti Amerikan i Shtetit bashkë me familjen e tij. Lajmi u dha nga Sekretari Amerikan i Shtetit, Anthony Blinken, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit është përfshirë në afera korruptive dhe ka pasuruar aleatët e tij politikë.
Sakaq, Berisha e ka konsideruar të pabazë këtë vendim, duke kërkuar që SHBA-të të bëjnë publike çdo provë që kanë kundër tij. Ai ka paditur Anthony Blinken, Sekretarin Amerikan të Shtetit. /Tirana Today
