Nga: Anxhela Ferra
Para viteve ’90 Liqeni i Tiranës ishte një nga vendet më të frekuentuara kryesisht nga çiftet. Kjo pasi ishte një nga vendet e vetme në kryeqytet, për të kaluar disa momente të bukura dhe intime. Edhe sot Liqeni vazhdon të jetë një nga zonat më të vizituara, por jo më nga çiftet. Më së shumti janë familjarët dhe mosha e tretë të cilët kalojnë disa orë.
Por ku shkojnë çiftet e reja sot?
“Unë vija me burrin, më pas dhe më fëmijët çdo të diel, hanim drekë, merrnim byrek dhe qëndronim gjatë. Çiftet e reja nuk i shoh të vijnë më te Liqeni. Më shumë janë të moshuarit. Ata shkojnë nëpër hotele, me makina. Janë shtuar shumë gjëra. Por, edhe këtu te Liqeni para pak vitesh ka qenë për faqe të zezë. Sipër te kodrat ishte ngritur një grup prostitucioni. Një shitëse që ishte aty lartë i shikonte dhe shkonin ato gocat e i kërkonin të merrte nga ato mbrojtëset. Asaj i vinte turp të shiste nga ato. Po shyqyr që i kapën dhe e mbyllën.”
Të moshuarit thonë për Tirana Today se në ato vite Liqeni frekuentohej shumë nga çiftet, të cilët uleshin në stola. Ose dilnin për piknik dhe me familjarët e vetë.
“Kur ishim të rinj, vinim më shpesh. Në atë kohë kishte shumë raste kur vinin maniakë dhe vetëm rrinin të shikonin çiftet. Kurse sot, janë më të lirë. Edhe në mjedise publike ka çifte të rinj të cilët puthen. Po të isha i ri tani dhe unë kështu do të kisha vepruar.”
“Edhe në kafe që shkojnë sot, mendjen e kanë të celulari. Kurse ne në atë kohë nuk kishim nga këto gjëra. Bënim më shumë shaka, muhabete të ndryshme. Ishte më mirë atëherë.”
“Në atë kohë çiftet vinin dhe uleshin nëpër stola. Dihet që atëherë ishte vetëm Liqeni dhe të dashuruarit nuk kishin ku të shkonin tjetër.”
Çiftet e sotme në vende të tjera
Ndërkohë të rinjtë shprehen për Tirana Today se përherë e më pak, Liqeni është një destinacion i çifteve për të kaluar çaste romantike. Kjo pasi ka më tepër alternativa.
“Një ditë mund të jetë nga Liqeni, një ditë tjetër në kafe, restorant etj. Gjithmonë varet nga nevojat ditore. Ndaj ne kemi më shumë mundësi zgjedhje, pse mos t’i shfrytëzojmë?! Liqeni nuk e ka më atë peshë që ka pasur dikur për çiftet.”
“Kanë ndryshuar kohërat, shkojmë më shumë nëpër lokale, ambiente të ndryshme. Vijmë shumë rrallë të ulemi në stola apo të kalojmë orë të gjata këtu.” TIRANA TODAY
