Lëvizja Vetëvendosje do të jetë tashmë zyrtarisht edhe në Shqipëri. Përfaqësues të kësaj force politike kanë bërë kërkesë për regjistrimin e saj në Gjykatën e Tiranës më 11 mars 2019.
Përmes një postimi në ‘Facebook’, këtë lajm e ka bërë të ditur një nga anëtarët e kësaj force, Boiken Abazi, i cili ndër të tjera zbulon dhe emrat e personave që janë pjesë e bordit drejtues të kësaj organizate.
Anëtarët e Bordit të kësaj organizate, të gjithë nënshtetas të Republikës së Shqipërisë, janë: Enis Sulstarova (Kryetar i Bordit i votuar unanimisht), Liburn Aliu, Hysamedin Feraj, Elvis Hoxha, Dejona Mihali, Sami Kurteshi, Arbër Zaimi dhe Gearda Demiraj.
“Qendra do të punojë në rritjen e vetëdijes se bashkimi kombëtar dhe integrimi i Shqipërisë, dhe më gjerë i shqiptarëve, në strukturat Euro-Atlantike (si Bashkimi Evropian dhe NATO) janë procese që duhen realizuar paralelisht dhe e plotësojnë njëri-tjetrin. Ajo ka për qëllim rritjen e ndërgjegjësimit dhe aktivizmit qytetar në Republikën e Shqipërisë mbi problematikat e shqiptarëve që jetojnë në treva autoktone shqiptare jashtë territorit të Republikës së Shqipërisë, dhe anasjelltas”, shkruan Abazi.
