Kryeministri Edi Rama nuk ka preferuar të komentojë propozimet e Partisë Demokratike për ndryshimin e Kushtetutës. Në konferencën për shtyp me ambasadorin Soreca, ai deklaroi se është gati të ballafaqohet me opozitën, pavarësisht se PS-ja aktualisht nuk po mendon për ndryshime kushtetuese. Kreu i qeverisë tha se propozimet do të diskutohen në mënyrë serioze, dhe në fund do të jepet një përgjigje zyrtare, pasi të ketë një diskutim të brendshëm. I pyetur nga gazetarët, nëse PS-ja është gati të ndërhyjë në Kushtetutë, Rama tha se vetëm Kurani dhe Bibla janë të paprekshëm. Në të njëjtën kohë bëri të ditur se nuk do të lejojë që të bëhet dialog në anglisht, duke lënë të kuptohet se kjo është një çështje që duhet zgjidhur mes palëve politike.
“Vetëm Biblën dhe Kuranin nuk mund të ndryshojmë, çdo gjë tjetër po, nëse biem dakort, nuk është e shkruar në gur. Mund të ketë vend për diskutim, por asgjë që nuk është e pandryshueshme. Ideja për të pasur një arritje janë shtysa për të shkuar përpara, nuk jemi në këtë moment dhe nuk është në vizionin apo në qëllimet tona që t’i futemi këtij ndryshimi.
Nëse të tjerët kanë ide të kësaj natyre, janë të mirëpritur të vijnë dhe të diskutojmë. Por, edhe një gjë, do ta përsëris edhe në sy të ambasadorit, sa të jem unë nuk ka më dialog në anglisht me opozitën. Nuk kemi pse fusim në siklet dhe miqtë tanë, janë të zëvendësueshëm, kanë interesin e tyre strategjik, e kanë këta, edhe BE-ja edhe SHBA-ja për ta pasur Shqipërinë të integruar. Dialogje në anglisht mes shqiptarësh…mund të ketë por jo për sa kohë drejtoj unë Kryeministrinë”, tha Rama.
