Kryeministri Rama ka hedhur poshtë akuzat e PD-së, që kërkon mandatin e ministres Olta Xhaçka, për shkak të marrjes së statusit të investitorit strategjik të bashkëshortit të saj. Kreu i qeverisë është pyetur për kërkesën e opozitës për Ministren e Jashtme Olta Xhaçka, që t’i hiqet mandati pas përfitimit nga ana e bashkëshortit të saj të statusit të investitorit strategjik. Ai kërkoi që gjykimi përfundimtar të vijë nga institucionet përkatëse.
“Unë besoj që është koha, ka kohë që ka kaluar koha në fakt nuk është sot, që ne, kur them ne, flas për veten e pjesën tone. Të dorëzohemi para faktit që vesi del me shpirtin dhe që këta që merren me këto punë, nuk do ndryshojnë kurrë. Kurrë për fat të keq. Ne natyrisht jemi shumë mirëpritës për çdo shenjë ndryshimi nga ana e tyre, por këta nuk do ndryshojnë e kjo tërheqje zvarrë e çdo gjëje dhe kujtdo qoftë që u del para për të bërë linçime dhe përbaltje publike është një praktikë që nuk do ndryshojë kështu që zgjedhja jonë është e thjeshtë. Dhe rruga jonë e përcaktuar, ose do bëjmë punët duke qenë të vetëdijshem se s’jemi perfekt. Kemi dhe ne të metat tona, ose do merremi me këta. Çdo minutë i humbur për t’u marrë me keta është gjynah i madh. Nuk shoh asnjë problem të natyrës së ngritur në këtë furtunë në gotë, unë personalisht, por le ta gjykojnë institucionet”, tha Rama.
