Presidenti turk, Recep Tayyip Erdogan, deklaroi se Aya Sofya do të hapet më 24 korrik për faljen e namazit të xhumasë.
Në një fjalim drejtuar kombit, Erdogan komentoi statusin e ri të Aya Sofyas, e cila u përdor si një muze në dekadat e kaluara, por do të shërbejë si xhami pas një dekreti të miratuar së fundmi sot.
Ai theksoi se dyert e kësaj godine do të jenë të hapura për turqit dhe të huajt, për myslimanët dhe jo-myslimanët, ashtu sikurse edhe të gjitha xhamitë e tjera.
“I ftoj të gjithë që të respektojnë vendimet e marra nga organet gjyqësore dhe ekzekutive të vendit tim mbi Aya Sofyan. Theksoj se do ta hapim Aya Sofyan si xhami duke ruajtur trashëgiminë e përbashkët kulturore të njerëzimit. Këmbëngulja që Aya Sofya të mbetet si një muze është kërkesë e barabartë me atë që Vatikani të shndërrohet në një muze”, tha ai.
Ditën e djeshme, një gjykatë turke anuloi dekretin e kabinetit të vitit 1934, i cili e ktheu Aya Sofyan në një muze.
