Familjarët dhe të afërmit e Rexhina Dobrovës, 25-vjeçares që vdiq pas lindjes së fëmijës, do të mbajnë sot një tjetër protestë para godinës së Maternitetit të Qendrës Spitalore, “Dr. Xhaferr Kongoli”.
Mësohet se protesta do të mbahet në orën 10:00, ndërsa familjarët e saj akuzojnë mjekët për neglizhencë të rastit, që shkaktoi më pas tragjedinë.
Familjarë dhe të afërm të Rexhinës i kanë bërë thirrje të gjitha nënave dhe personave që e gjykojnë të arsyeshme që t’u bashkohen këtë të enjte për të protestuar.
Ata protestuan edhe një ditë më parë para Gjykatës së Rrethit Gjyqësor Elbasan, kur zhvillohej seanca e vlerësimit të masës së sigurisë për dy mjekët e arrestuar nga policia pas vdekjes së 25 vjeçares me banim në lagjen “Vullnetari” në qytetin e Elbasanit. Rexhina Debrova , ndërroi jetën pas një komplikacioni të rëndë në maternitetin e Elbasanit një orë pasi solli në jetë fëmijën e saj e parë.
