Prokurori i Përgjithshëm Olsian Çela ka qenë në Vlorë, për analizën e KLSH-së. Pas takimit është pyetur për padinë e presidentit Meta në SPAK për ministren e Drejtësisë Etilda Gjonaj. Ai nuk ka preferuar të prononcohet, duke thënë se nuk ka lidhje.
Përsa i përket aksionit të sotëm në Lazarat ku thuhet se janë arrestuar 8 persona, mes tyre një ish-kandidat për deputet dhe janë shoqëruar rreth 40 të tjerë, Çela tha se është “puna e Prokurorisë së pavarur, zbatimi i ligjit, Reforma në Drejtësi. Këto janë rezultatet”.
Ministrja e Drejtësisë Etilda Gjonaj iu përgjigj dje zyrtarisht akuzave të presidentit Ilir Meta. Ky i fundit prej disa kohësh ka shpërthyer në sulme të forta ndaj Gjonajt, ku dhe e paditi penalisht për “shpërdorim detyre” për botimin në Fletoren Zyrtare të emrit të Arta Vorpsit si anëtare e Gjykatës Kushtetuese.
Gjonaj u shpreh se akuzat e presidentit Ilir Meta janë një lajthitje ligjore, duke sqaruar më tej procesin e përzgjedhjes së anëtarëve të Gjykatës Kushtetuese. Ministrja e Drejtësisë u shpreh se botimi në Fletoren Zyrtare i vendimeve të Këshillit të Emërimeve në Drejtësi, është bërë në përputhje të ligjit.
