Kryeministri Edi Rama ka injoruar zhvillimet në kampin opozitar, me largimin e Berishës nga grupi i PD. Ai nuk ka pranuar të bëjë komente, ndërsa përgjigjja e vetme që dha ishte se dora e tij është e shtrirë qoftë edhe ndaj PD për zhvillimin e vendit.
“Sa më shumë energji të shpenzuara për njerëzit, për problemet që kanë. Sa më pak energji për atë që politika ka bërë në shumë vite, duke u bërë një pronë e politikanëve, të cilët e kanë abuzuar vijimësisht”, tha Rama.
A jeni i kënaqur që Basha vrau “babain” politik?
PS ka marrë një mandat të tretë, për të çuar Shqipërinë në një nivel tjetër.
A do bashkëqeverisni me Bashën?
Dora është e shtrirë për të bashkëpunuar pavarësisht zhvillimeve në PD.
A keni pazar me Bashën?
Jam shumë i përgatitur që të jem në lartësinë e fjalëve, duke dhënë shembullin i pari dhe duke u përmirësuar çdo ditë në raport me ju. Ju jap fjalën që do bëj çmos që marrëdhëniet me ju (gazetarët) të jenë fantastike.
Të njëjtën gjë bëtë dhe ju me Fatos Nanon?
E kuptoni sesa e madhe është sfida jonë, hallet problemet, por edhe shpresat tek PS. PS e ka të pamundur të shohë nga lart poshtë, sepse humb perspektivën. Jemi shumë përpara, nuk do kthejmë kokën pas. Kushdo që të bashkohet me ne, është i mirëseardhur.
