Ish-presidenti dhe ish-kryetari i Këshillit Kombëtar të Partisë Demokratike, Bujar Nishani, akuzon Bashën se ka shkelur çdo normë dhe statutin e partisë me përjashtimin nga grupi parlamentar të Sali Berishës.
Në një status në Facebook, Nishani shkruan se ky vendim duhet të ishte konsultuar me të gjitha forumet e PD-së. Nishani ka një këshillë ndaj të gjithë mbështetëve të PD-së, të mos dorëzohen përballë këtij provokimi të rëndë për asgjesimin e fondamenteve më bazike të demokracisë.
Ai kërkon që të luftojnë çdo ditë për ringritjen e Partisë Demokratike, për rivendosjen e parimeve dhe garancive bazë të lirisë, të së drejtës dhe demokracisë në këtë vend.
Në fund e mbyll me një kërkesë në shenjë këmbane alarmi, se kushdo që hesht sot është bashkëfajtor në asgjesimin e PD-së, dhe vlerave të demokracisë në tërësi.
Statusi
Lulzim Basha ka vepruar si një skuth !
Një njeri i katapultuar në krye të Partisë Demokratike, pa asnjë kontribut politik e partiak, pa asnjë sakrificë dhe eksperiencë në beteja politike, një përfitues i përhershëm pa kurrfarë meritash, vendos të përçajë në mënyrë fatale atë parti.
Lulzim Basha fyen, përçmon e injoron çdo institucion e rregull minimal në Partinë Demokratike, duke marrë një vendim ekstrem, të përjashtimit nga Partia Demokratike të themeluesit të saj pa asnjë diskutim në forumet e partisë, pa asnjë mbështetje në statutin dhe rregullat legale të partisë, pa asnjë procedurë vendimarrëse të Kryesisë, Këshillit Kombëtar apo Kuvendit të Partisë Demokratike !
Vendimet personale, në fshehtësi, në mungesë të diskutimit midis të zgjedhurve legjitim të demokratëve, jashtë forumeve të partisë, janë karakteristika të një skuthi politik.
Ky akt është dhunim i rëndë i parimeve më fondamentale të lirisë, drejtësisë dhe demokracisë !
Ky është Lulzim Basha që u katapultua politikisht me misionin e asgjesimit të Partisë Demokratike, asgjesimin e së djathtës në politikën shqiptare, asgjesimin e alternativës qeverisëse përballë së majtës, trashegimtare e stalinistëve shqiptarë filoserbe.
Ky është sot pengu dhe argati i Edi Ramës, në krye të Partisë Demokratike !
Demokratët, shqiptarët e ndershëm, njerëzit e lirë dhe patriotë duhet të mos dorëzohen përballë këtij provokimi të rëndë për asgjesimin e fondamenteve me bazike të demokracisë.
Cilido që beson tek vlerat, parimet dhe morali, duhet të luftojë çdo ditë për ringritjen e Partisë Demokratike, për rivendosjen e parimeve dhe garancive bazë të lirisë, të së drejtës dhe demokracisë në këtë vend.
Kushdo që hesht sot është bashkëfajtor në asgjesimin e asaj partie dhe vlerave të demokracisë në tërësi!
