PD ka paditur për shpifje kryetarin e Bashkisë së Tiranës, Erion Veliaj. Kjo forcë politike kërkon dënim maksimal për kryebashkiakun Veliaj, pasi akuzohet se ka thënë 3 mashtrime për kryedemokratin Basha.
Sipas PD-së, shpifjet e Erion Veliajt për Bashën janë: Kryetari i PD u bë me 4 shtëpi gjatë tërmetit dhe pandemisë. Kryetari i PD ka përfituar gjatë periudhës së fatkeqësisë. Kryetari i PD ka ndërtuar kate pa leje.
Partia Demokratike thotë se Veliaj po shpif qëllimisht ndaj Bashës, për të përfituar në zgjedhje.
“Këto të pavërteta janë bërë me qëllim dëmtimin e reputacionit dhe dëmtimin e imazhit në mënyrë të qëllimshme, duke qenë se Lulzim Basha është kryetar i PD në opozitë dhe Erion Veliaj, si drejtues i fushatës zgjedhore të PS për qarkun e Tiranës, këto deklarime shpifëse i përdor për të përfituar kredo politike përballë qytetarëve, si për vete dhe për PS”, thuhet në padinë e ngritur për shpifje ndaj Erion Veliajt.
