Skandalet seksuale dhe akoma më rëndë vrasjet nuk janë diçka e panjohur për shoqërinë tonë. Por, ndërsa në çdo shtet të zhvilluar, qeveritë, institucionet nisin të marrin masa që sapo nisin fenomene të tilla. Në Shqipëri duket se ndodh e kundërta, ose më saktë nuk ndodh asgjë. Sepse këtu çudia më e madhe zgjat 3 ditë.
Kjo javë nisi me publikimit e skandalit seksual të shefi të policisë së zonës Grumiere (Malësi e Madhe), Berhan Bajrakurti. Ky i fundit ka ngacmuar seksualisht një vajzë 15 vjeçare duke bërë edhe akte të turpshme në video.
Por, pa kaluar as “3 ditshi” i çudisë, një tjetër ngjarje e rëndë u kthye në titujt kryesorë të mediave. Një ditë më parë gardisti Alket Arapaj vrau gruan me armën e shërbimit. Kjo pasi sipas tij ajo e tradhtonte. Dhe me konsideratën e cekët të të pasurit si “pronë”, ai i merr jetën.
Por, çfarë mendon shoqëria shqiptare për këto fenomene? Sa të ndjeshëm jemi përballë një ngacmimi seksual veçanërisht me një minorene dhe mbi të gjitha sa e vlerësojmë jetën e një të pafajshmi të panjohur? Tirana Today pyeti qytetarët, ku disa konsiderojnë hallet e veta më të mëdha.
“Nuk na intereson fare. Më vjen keq për atë gruan e vrarë, por nuk na intereson sepse na ka mbytur fukaralliku.”
“Gjëra që ndodhin janë, budalliqe. Lëri mo ato, kot janë.”
Të tjerët i dënojnë si akte, madje bëjnë thirrje për nisjen e testeve të vazhdueshme psikologjike për policët. Por, përsëri gjithçka qëndron në nivelet e retorikës. Ende jemi shumë larg ndërgjegjësimit.
“Nëse mblidhen 3 gjëra, katundar, shqiptar dhe polic nuk mund të bëhet më fjalë për njeri. Janë mall bylyk i themi ne. Policia shqiptare është e përbërë nga njerëz të papërgatitur. Të cilët ndër të tjera ndjehen dhe si të fortë e pastaj ndonjëherë hanë kokën, ndonjëherë i bëjnë dëm të tjerëve.
Nuk është hera e parë që një gardist kryen vrasje apo vetëvrasje. Kjo vjen sepse të punosh për disa ministra delenxhinjtë mund të arrish të varësh dhe veten, se ata të shesin”
“Ai gardisti ka pasur devijim psikik, nuk ka mundësi një njeri normal ta bëjë atë gjë. Unë jam mjeke dhe mendoj që gjithë policët duhet të bëjnë teste psikologjike patjetër, në mënyrë të vazhdueshme. Nuk janë të gjithë ashtu, por bie një dhe prishen krejt e humb besimi.”
“Policia shqiptare nuk është shumë në rregull. Nuk mund të hapim televizorin te lajmet se vetëm kronika të zeza. Vettingu që po bëhet për gjyqtarët e prokurorët, duhet të zhvillohet dhe te policët. Por, jo vetëm tek pasuria, por edhe te psikologjia e tyre. Sepse po marrin në qaf femrat që janë të pafajshme.”
“Kur nuk ka ligje, do të ketë dhe krime. Të gjithë duhet të ngrihemi në këmbë, opinioni të luftojë këto krime.”/ TIRANA TODAY
