Policia e Bulqizës duket se është drejt zbardhjes së ngjarjes së rëndë, ndodhur mbrëmjen e djeshme, ku ka humbur jetën një i ri. 22-vjeçari Elidon Basha që ka mbërritur i pajetë në Spitalin e Tiranës në orët e para të ditës së sotme, dyshohet se është vrarë me armë gjahu aksidentalisht, nga shoku i tij.
I ndjeri Elidon Basha kishte dalë për gjueti në Fushë Bulqizë me shokun e tij, 27-vjeçarin Klodian Kola. Burimet nga ana e policisë bëjnë me dije se ka dyshime, se nga pakujdesia ky i fundit ka qëlluar me armë gjahu shokun e tij duke e plagosur. Pavarësisht se 22-vjeçari është dërguar me urgjencë në spital, nuk ka mundur të jetojë.
Nga ana e uniformave blu janë gjetur dhe sekuestruar në cilësinë e provës materiale arma e gjahut, një elektrik dore, motomjeti me të cilin këta shtetas kishin shkuar për gjueti dhe sende të tjera të vlefshme që do t’i shërbejnë zbardhjes së ngjarjes. Shërbimet e policisë kanë shoqëruar në Komisariatin e Policisë Bulqizë, autorin për veprime të mëtejshme hetimore.
Njoftimi i Policisë – Bulqizë/ Informacion paraprak
Dyshohet se e plagosi me armë gjahu aksidentalisht shokun e tij, i cili humbi jetën, shoqërohet në Polici 27-vjeçari.
Rreth orës 23:30 të mbrëmjes së djeshme, në një kodër të fshatit Fushë Bulqizë, shtetasi K. K., së bashku me shtetasin E. B., në rrugën Fushë Bulqizë – Kodër Dane, dyshohet se kanë qenë duke gjuajtur me armë gjahu çifte.
Dyshohet se nga pakujdesia shtetasi K. K. ka plagosur shokun e vet, shtetasin E. B., 22 vjeç, i cili ka humbur jetën rrugës për në spitalin e Tiranës.
Menjëherë pas njoftimit të marrë u ngrit grupi hetimor për zbardhjen e ngjarjes. Falë veprimeve të para hetimore, nën drejtimin e Prokurorisë, u gjetën dhe u sekuestruan në cilësinë e provës materiale arma e gjahut, një elektrik dore, motomjeti me të cilin këta shtetas kishin shkuar për gjueti dhe sende të tjera të vlefshme që do t’i shërbejnë zbardhjes së ngjarjes.
Shërbimet e Policisë kanë shoqëruar në Komisariatin e Policisë Bulqizë, shtetasin K. K., 27 vjeç, për veprime të mëtejshme hetimore.
Nën drejtimin e Prokurorisë, strukturat hetimore të Drejtorisë vendore të Policisë Dibër vijojnë punën për zbardhjen dhe dokumentimin e plotë të ngjarjes.
