Një burrë 50-vjeçar, i cili gëlltiti një qese najloni me drogë pasi u ndalua nga policia për një kontroll, humbi jetën teksa pësoi asfiksim dhe mbytje për shkak të lëndës psikotrope.
Incidenti ndodhi pak pas urës lundruese të Lefkadës të hënën në mbrëmje, në Greqi, kur policia ndaloi makinën që po drejtonte 50-vjeçari për një kontroll.
Sipas “Protothema”, burri gëlltiti një qese që përmbante afërsisht tetë gramë heroinë.
Megjithatë, pakoja i bllokoi rrugët e frymëmarrjes, duke bërë që ai të fillonte të mbytej. Me të parë personin që ndihej keq dhe humbi ndjenjat, policia e dërgoi në spitalin e Lefkadës.
Sipas të njëjtave informacione, ai u intubua dhe pavarësisht përpjekjeve të mjekëve, vdiq.
Autoriteti Portual i Lefkadës ka ndërmarrë hetime paraprake për rrethanat e sakta të incidentit.
