Nëse njerëzit nuk vetë-karantinohen, e po kështu injorojnë udhëzimet e autoriteteve, në Iran mund të vdesin rreth 3.5 milionë njerëz. Ky parashikim vjen nga një raport i përgatitur nga shkencëtarë të Universitetit “Sharif” në Iran.
Raporti në fjalë, i publikuar në faqen e lajmeve “Tinn”, përshkruan tri skenarë mbi pasojat e mundshme të koronavirusit në Iran.
Skenari i parë tregon se çfarë do të ndodhë nëse karantina zbatohet plotësisht. Sipas këtij skenari, në të cilin 80 për qind e njerëzve do të izoloheshin nga njëri-tjetri, numri i rasteve vlerësohet të arrijë në 120.000 dhe ai i vdekjeve në rreth 12.000 në ditët e para të muajit prill, kur epidemia do ta arrinte kulmin.
Sipas skenarit të dytë, në të cilin masa e karantinës nuk do të zbatohej plotësisht dhe kontakti mes njerëzve do të ishte 50 për qind, parashikohet që deri në fund të prillit numri i rasteve të jetë 300.000 dhe ai i vdekjeve rreth 110 mijë.
Skenari i tretë është ai që nëse karantina nuk do të zbatohej. Parashikohet përkeqësim i shëndetit publik dhe shkalla e përhapjes së virusit pritet të jetë rreth 65 përqind. Në këtë rast thuhet se kulmi i epidemisë do të vazhdojë deri në ditët e fundit të majit, dhe numri i të infektuarve do të jetë rreth 4 milionë dhe ai i vdekjeve 3.5 milionë.
Në Iran zyrtarisht janë njoftuar 988 viktima dhe 16.169 raste të personave të infektuar.
Sapo u sinjalizuan rastet e para, shtetet më të fuqishme ishin në konkurrencë me njëri-tjetrin për krijimin e një vaksine, për ti dhënë fund kësaj gjëndje të jashtëzakondshme.
SHBA filluan fazën e parë të një vaksine eksperimentale, e bazuar në teknologjinë mRNa e zhvilluar nga grupi i bioteknikës Moderna dhe Instituti Kombëtar i Shëndetësisë.
Vaksina e zhvilluar nga Cansino dhe studiuesit ushtarakë kinezë, është ajo në të cilën janë shpresat më të mëdha në Kinë, ku aktualisht janë në zhvillim nëntë vaksina. Testet e para klinike të të cilave priten të bëhen në muajin prill.
Japonia është gjithashtu duke vrapuar për gjetjen e një kure. Sipas Reuters, një kompani e kontrolluar nga Fujifilm, po prodhon një antiviral të quajtur Avigan dhe i njohur edhe si Favipiravir, i cili ka dhënë rezultate të mira në shërimin e të infektuarve.
